Vawiin chawhnu dar 2 khan Champhai District Road Safety Committee (DRSC) chu DC Conference Hall, Keifangtlangah an Chairman Champhai District Bawrhsap ni bawk Pu Vanlalngaihsaka hovin an thu khawm a. He hunah hian kumin February ni 12-18 chhunga Road Safety Week Vawi 29-na hman dan tur an sawi ho.

Kum hmasa lama Week hman dan report ngaihthlak niin, kumina Road Safety Week hawnna chu February ni 12, chawhnu dar 2-ah I&PR Auditorium, CHANEM Building-ah neih ni se, tih a ni a. A hawnnaah hian Pi Lalsangpuii Hmar, Champhai Addl.DC chu Khuallian tur niin, prograamme neih dan turte duan a ni a.  He hunah hian Sawrkar Office head-te, Sub-Hqtr YMA, MUP, MHIP hruaitute, khawtlang hruaitute, Champhai khawpui chhunga lirthei khalhtu leh neitute zau taka sawm khawma, lirthei khalh chungchanga hriat tur pawimawhte inzirtirna hun hman tum a ni.

Road Safety Week hman chhung hian Motor-a tar chi flag leh banner-te pawh siam leh tura ruahman a ni a. Meeting chuan kumin Road Safety Week chu uar leh zual zawk a hman nise, lirthei khalhtute pawhin khalh thiam chauh duhtawk lova, fimkhur leh hawihhawm zawk, dan leh dun ngai pawimawh chung zela lirthei khalh an zir thar a pawimawh thu a tarlang bawk a ni.