Mizoram Government Drivers' Association (MGDA) chuan vawiin khan Synod Conference Hall-ah General Conference vawi 27-na an hmang a. He hunah hian Pu Lal Thanzara, Minister of Health, PWD, I&PR chu khuallian a ni.

Minister chuan MGDA member-te chu hna zahawm leh pawimawh tak thawktu, mawhphurhna lian tak chelh an nih thu sawiin, an hnathawh naah fimkhurna vawng reng turin a chah a. Duty hun chhunga ruihtheihthil laka insum leh fihlim a tul thu te sawiin, anmahni chauh nilo an pi leh pute zahawmna keng tel an ni tih hre reng chungin hawihhawmna, thawhrimna, insumtheina leh rinawmna te chhawm nung zel turin kalkhawmte chu chah a. Minister Pu Lal Thanzara chuan Driver-te hamthatna tura sawrkarin hma a lo lak tawhna hrang hrang tarlangin, sawrkar a thawk anni emaw, private hnuaia thawk pawh nise driver-te tan theihtawp chhuaha an hamthatna tur ngaihtuah zel a nih tur thu a sawi a. “Nun hlutna tak tak dai thleng turin kan eizawnna hna theuhvah hian hlimpui tham thil ti turin thawkrim theuh turin ila, rinawmna nen dik taka kan hnate kan thawh hian nun hlutna chu a lo piang thin a ni” Minister chuan a ti.

Pu Lalramnghaka, President MGDA-in he hun hi kaihruaiin, an member 44 boral tate sunna hun neih a ni a. Khuallian chuan a zawna kum 10 chin pawl OB hna lo chawlh tawh mi pali hnenah hruaitu hlun chawimawina a hlan bawk. Chawhnu lamah MGDA President Pu Vanlalchhunga kaihhruaiin rorel leh hruaitu thar thlanna neih chhunzawm a ni.

Vawiin MGDA General Conference-ah hian member-te chuan 7^th Pay chungchangah resolution siamin, thil man to chho zel avanga sawrkar laipui leh state dang engemawzah in 7^th Pay an hman hnua Mizoram sawrkar pawhin a hnathawkte 7^th Pay hman ve theih dan tur kawng ngaihtuaha hma a la chu chu lawmawm an tih thu leh, a hma thei ang bera hman a nih ngei theih nan hmalak zui a nih an beiseina leh, he sawrkar hmalakna ti sukuk thei engmah awmlo tura an beisei thu te he resolution ah hian a tel a ni.

Mizoram Government Drivers’ Association hi September ni 4, 1964 khan din tan a ni a. November ni 3, 1987 khan Sawrkar-ah Firm & Society hnuaiah register a ni. MGDA hian tun dinhmunah Sub-headquarter 8 leh Branch 3 a nei mek a ni. Kum khat (1) danah General Conference hmang thin a ni. Kum 2016 atanga vawiin thleng khan MGDA member pension a chhuak 53 an awm a ni. MGDA hian India ram pum huap Sawrkar Driver inzawmkhawm pawl All India State Govt. Drivers' Forum nen thawhhona nghet tak an nei bawk a, 4.9. 2014 khan India ram pum huap Sawrkar Driver-te sawmin Mizoram Govt. Drivers’ Association chuan Golden Jubilee an lo hmang tawh a ni.