Vawiin chawhma khan Champhai District Level Fire Prevention Committee chu an Chairman DC Pu Vanlalngaihsaka hovin I&PR Conference Hall, CHANEM-ah kumin Fire Prevention Week hman dan tur leh ram tikang hremna bakah zau zawka ram tikanglo tura inhrilhhriat theih dan tur ngaihtuahin an thukhawm.

Champhai DC Vanlalngaihsaka chuan ram kang laka mimal leh pawl tam takin an nunna hial thapa theihtawp an chhuah laiin Dan palzuta ram tih kan pawisa miahlo kan la awm thin hi chuan kan rilru a la changkan tawkloh zia a tilang a ni, a ti a. Ram kang laka inven kawngah hian NGO-te leh VC-te nen thawhona tha pawimawh a tih thu a tarlang bawk.

Fire Prevention Week 2016 hi February ni 10 atanga ni 16 chhung hman tur a ni a. Committee chuan Week hawnna hi February ni 10-ah Champhai khawchhungah hman a rel a. Hemi bakah hian khua thlan bikah te Awareness Campaign neih a rel bawk.

State Level Sub-Committee on Fire Prevention-in a rel angin kumin March ni 15, 2016 aia tlai lo ah Lo/Huan hal vek tur a ni a. Hemi dan bawhchhiate hremna chu vawiin Committee hian ngaihtuahin, kumdang aia khauh zawka kalpui turin ruahmanna a siam a. Kum dang ang bawkin World Environment Day-a lawmman sem turin kumin hian Village Level Fire Prevention Award dawng tur thlan leh a ni ang a. Ram kang laka inven kawnga hma la tha ber khua pathum hnenah lawmman hi hlan a ni dawn a ni.