Vawiin chawhnu khan Health and Family Welfare Minister Pu Lal Thanzara kaihhruaiin a pisaah Legislators Forum on AIDS an thukhawm.
He meeting-ah hian nikum a MLA tin ten an Fund atanga cheng nuaikhat theuh HIV/ AIDS veite enkawl nan leh venhim nana hman rem an tih bawhzuia Office Bearers te thutkhawmna hmasa ber a ni a, pawisa tlingkhawm hman dan turte relin pawm nghal a ni.
Health and Family Welfare Minister Pu Lal Thanzara’n member ten HIV/ AIDS dona kawnga thahnem an ngaih chu lawmawm a tih thu a sawi a, Forum Secretary Dr. K. Beichhua, MLA pawhin kan dinhmun a that tawh loh zia leh tan kan ngaih zual thu a sawi tel bawk a ni. MSACS Project Director leh Ex-officio member Dr. Lalmalsawmi Sailo chuan member kal te hnenah mipui tana an inpekna chu lawmawm a tih thu a sawi rualin Mizoram HIV/AIDS dinhmun tlangpui a tarlang bawk.
ART ei tan turin CD 4 test hi a ngai a, CD 4 hi thla ruk dana HIV vei te tana tih ziah tur a ni. ART Centre, Civil Hospital a mi hi Aizawl khawpuia awmchhun a nih a vangin a rim in a khat tawk a siamthat a ngaih phah a, HIV/ AIDS damloten inenkawl chungchangah harsatna an tawk ta fo a ni. Hemi harsatna phuhruk tur hian meeting chuan CD 4 Count Machine thar lei a rem ti a ni.
HIV hrikpai hmuhchhuah thar atanga 75% aia tam mah hi sex atanga inkaichhawn niin, a hrikpai hmuhchhuah thar zinga 70% aia tam hi mipui mimir te an ni tih meeting chuan a tarlang a, Za zela chhutin Mizoram mipuite hi India rama HIV/ AIDS hrik pai hnem ber dawttu kan lo nih takah chuan awareness leh condom promotion a tul tawh thu an sawi a. Mipuite chu a nilo zawnga ngailo hram tur leh kan that tlan zawkna tura ngaiin lungrual taka hawhho an duh thu meeting-ah hian an sawi nghal a ni.
Kum 2015-16 Financial Year atana budget 20% a tih hniam a nih avangin sum indaih lohna a nasa hle a. Drugs hmang thinte’n HIV an kai lohna tura hriau leh syringe pawh an indaihloh phah hle tih meeting ah tarlan a ni a. He indaihlohna phuhruk tur hian meeting chuan pawisa hman rem an tih bakah Link Workers ten Sexually Transmitted Infection (STI) drugs an sem tur lei an remti nghal bawk a ni.
A thlawna thisen pek hi kumhnih kalta atanga a tlakhniam tak em avangin Blood Donation Motivation Campaign-te pawisa awm atangin nasa zawka kalpui nise meeting chuan a ti.
HIV/ AIDS leh zu kaihhnawih vanga Rashtriya Swasthya Bharat Yojana (RSBY) hmang ve theilo te tan hmalak an tum thu meeting-ah hian an sawi nghal a. Eng natna pawh hospital a chhuifiah anih hian investigation tihna man chawi ziah a ngai a, BPL te ngaihnathiam an nih avangin HIV hrikkaite pawh he investigation charge hi chawi tawhlo turin ruahmanna siam nise, hemi rual hian PLHIV ten Health Care Scheme leh RSBY an bill ve theihna turin hmalak dan ngaihtuahpui nise tiin meeting hian a rel bawk a ni.
He meeting-ah hian member Dr. K. Beichhua, MLA, Pu K. Lalrinthanga, MLA, Pu (Er) Lalrinawma, MLA, Pu John Siamkunga, MLA, Pu T. Sangkunga, MLA, Pi Vanlalawmpuii Chawngthu, MLA leh MSACS Project Director Dr. Lalmalsawmi Sailo te an tel a ni.
