Vawiin chawhma dar 11 khan Champhai I&PR Auditorium Hall-ah NLUP chungchanga “Training Cross-Sector Verification Team” te tan neih a ni a. Champhai DC Pu Vijay Kumar Bidhuri chuan he training hi a hawng a ni.Cross Sector Verification team hi khawtin ten 20 March, 2011 khan an din fel a ni.

Hawnna thu sawiin Champhai DC chuan NLUP hi sorkar policy pawimawh tak a ni a. Vawiina hetiang a Line Department Officer te nena training neih theih a ni hi a lawmawm em em a ni tiin NLUP dawngtute zawng zawng pawh uluk taka an hmalakna a hmun a endik Proper Verification a pawimawhzia hriain sum leh pai senso te a hautak lohna atana vawikhat endikna ah a tul zawng zawng hre chiang tur leh TA/DA ti hek lo zawnga hnathawh nan Cross-Sector Verification hi buatsaih a nih thu a sawi a. Cross Sector Verification Team hi Mizoram ah chuan Champhai District hi a kalpui hmasa ber tur an ni a, a tum ber chu Line Department staff nei tlem te pawhin mumal taka inspection an kalpui theih a ni tih sawiin, Line department hrang hrang ten department danga NLUP dawngtute hmalakna an enfiah tur chu final report a nih tawh dawn avangin chiang taka enfiah a ngai a, a tulah chuan an hnathawhna kawnga puih an ngaihna ah inthlahrung lo tura chahin training tha tak an neih theih nan duhsakna hlanin he training hi a hawng a ni.

He training kaihruaitu Pu Lalfakzuala, Champhai District NLUP Nodal Officer chuan NLUP hnathawhna kawnga Champhai District DC Pu Vijay Kumar Bidhuri hmalaknaah lawmthu sawiin a hma lawka DC hova meeting an lo neih thinna bawhzuina chu hlawhtling a, hetiang an nei chu lawmawm a tih thu a sawi a, Cross Sector Verification Team kaihhruaina tura duan lawkte a sawi nghal bawk a ni.

Ruahman dan chuan Cross Sector Verification Team (CSVT) tin ah hian Nodal Officer 2 aia tlem lo an awm ang a, NLUP hnuaia hmalakna a theih anga zingin an nei thin dawn a ni. An tihtur chu work calendar mil in NLUP dawngtuten hma an la em tih te, hma la tha lo zawn chhuah te niin Department lam atanga transfer tul leh pawimawh bik tak a awm a nih loh chuan Deputy Commissioner hriatpuina lo chuan he team a mawhphurhna la tute hi sawn awih a ni lova, loh theih lova transfet a awm a nih chuan a changtu department in a aiawhtu tur an ruat fel ang a. CSVT team hian endik hna hi hmalakna hmun ah ngei kalin an nei tur a ni. Hemi atan hian aikal lak awih a ni lova, hetiang hi an awm a nih chuan an chungah action lak an ni ang. CSVT te hian anmahni thawhna Department hnuaia beneficiaries te mai bakah an khua/veng chan theiha NLUP hmalakna zawng zawng department danga mite pawh huamin an endik vek dawn a ni.

He training ah hian heng Line Department hrang hrang Agriculture, AH & Vety, Fisheries, Forestry, Horticulture, Industry, Sericulture leh Soil & Water Conservation a department officer ten sawihona neih zui nghal a ni.

Cross Sector Verification Team hian endik hna hi April thla chhungin a thawhkhat nan an nei nghal dawn a ni.