Vawiin khan Champhai District Level Teachers’ Day Celebration Committee chu an Chairman Champhai DC Pu H. Lalengmawia hovin kumin Teachers’ Day hman dan tur ngaihtuahin Champhai Circuit House Conference Hall-ah an thukhawm. He meeting-ah hian Member Secretary, DEO Champhai bakah SDEO Champhai leh Khawlzawl te, DPC (SSA), Zirtirtu pawl – MISSTA, MSTA leh PTA aiawhte, Govt. GMHSS Principal, DIPRO, Tlawmngai pawl hrang hrang aiawhte leh member dangte an tel a ni.

Meeting kaihruaitu DC chuan Zirtirtute Ni chu zirtirtute pawimawhna leh rawngbawlna chawimawina ni anih mai bakah zirtirtu hna zahawm takin a ken tel mawhphurhna lian tak tak te hriat thar lehna ni a nih thu a sawi a ni a. Committee chuan kumin Teachers’ Day hi Champhai khawchhung-ah chuan GM Hr. Sec. School , Town Hall, Venglai Community Hall, Bethel Veng Hall, Kanan Veng Hall bakah Ruantlang, Tlangsam, Zote leh Hmunhmeltha ah te a huhova school hrang hrangten an hman a rel bakah District chhunga khaw 10-ah hetianga hman tur hian ruahmanna a siam a. Heng hmunah te hian District Level Committee chuan hmanpuitu tur a ruat theuh bawk a ni. Kumin Teachers’ Day denchhen hian Committee chuan Panel Discussion neih a rel bawk.