Sports Minister Pu Zodintluanga chuan vawiin tlai khan Rajiv Gandhi Stadium, Mualpui ah tleirawl kum 14 chin chunglam tana Non Residential Football Coaching buatsaih chu a hawng.
Hawnna thu sawiin Minister chuan tleirawl laia kalkawng dik an zawh theih nana kaihhruaina ruahmansak chu a pawimawh a ni, a ti a. Chutiang atana Sports & Youth Services Department-in school kal tleirawl rual tan an class kal tibuai lova football zirna a buatsaih chu lawmthu a sawi a. Eizawnna tling khawpa thiam turin Coach ten an hrual chho dawn a ni, a ti.
He hun hmanpuitu Pu Lal Thanzara, MFA President pawhin thusawiin Minister chak tak hmalakna azarah Mizoram-in nasa taka football-a hma a sawn thu te a tarlang a. Football chu infiamna mai nilovin eizawnna tling a nih thu sawiin Mizo footballer te pawhin eizawn nan hmanga, nu leh pa leh chhungkaw chawmtu-a an tan tawh thu te a sawi lang bawk. Football lama hma kan sawn chak avangin AIFF leh FIFA ten min rawn hmelhriat tawh a ni tiin Pu Lal Thanzara chuan a tul angin training pawh an rawn neihpui tur thu a sawi lang bawk.
Non Residential Football Coaching hawnna hi Pu Zothanmawia, Director, Sports & Youth Services-in a kaihruai a, MSSC Secretary Pu C.Laltlanthanga leh midang ten an hmanpui bawk.
Non Residential Football Coaching hi tlai lamah neihpui thin tur a ni a, thla 4 chhung vel awh tur a ni. Coaching hi mi 80 velin an nei dawn a ni.
