Nimin chawhnu khan Champhai Circuit House-ah District Bawrhsap Pu Vanlalngaihsaka, IAS chuan pawna daikal awmlohna, Open Defecation Free (ODF) District-a Champhai District puan a nih endik a lo kal, Quality Council of India (QCI) Auditor team-te a kawm a. Bawrhsap hi District Official - DRDA Project Director Pu CC. Lalchhuangkima, SE (PHE) Pu Lalrammawia, EE (PHE) Pu K. Zohmingliana, SDO (PHE) Pu V. Laldanmawia leh DI&PRO Pu Neng Thianlala bakah Champhai District chhunga RD Block hrang hranga SDO/BDO - Pu V. Lalruatliana, Ngopa SDO/BDO; Pu Lalrinzuala, Khawzawl BDO; Pu James Lalnithanga, Khawbung BDO; leh Pi PC Zonuntluangi, Champhai BDO ten an tawiawm a ni.
Champhai District Bawrhsap Pu Vanlalngaihsaka chuan ODF District-a Champhai District puan a nih theih nana sawrkar hmalakna hrang hrang tarlangin District pum endik tura QCI Auditor-te thawhrimnaah lawmthu a sawi a, ODF District ni tura hmalakna kawnga harsatna hrang hrangte hrethiam chunga an report thehlut turin a ngen a. Auditor-ten an duhkhawp lohna an sawite leh rawtna an thlente chu rang taka bawhzui a nih tur thu a sawi bawk. SE (PHE) Pu Lalrammawia pawhin mipuite zirtirna uar taka pek a nih thu a a sawi a ni.
QCI Auditor-te hi insem darhin thlan bik khaw sawm hnih: Champhai RD Block atangin Tualcheng, Hnahlan, Ngur, N. Khawbung, Vaikhawtlang; Ngopa RD Block atangin Kawlbem, Ngopa, NE Khawdungsei, Pawlrang, Hliappui; Khawzawl RD Block atangin Chawngtlai, Tualte, Rabung, Chhawrtui, Neihdawn; leh Khawbung RD Block atangin Farkawn, Vaphai, Samthang, Dungtlang, Khawbung te an endik a. QCI Team-te hian khaw hrang hranga an thil hmuhte sawiin ODF chu vawi khat nih mai a tawk lova, mihring pung zel mila hmalak chhunzawm reng ngai a nih avangin Champhai District Open Defecation Free a nih zel theih nan rawtnate siamin state danga chin dan tha, Champhai District-a hman ve theih tura an rinte Official-te an kawhhmuh a. Official-te pawhin ODF atana hmalakna hrang hrangte leh harsatna awmte QCI team-te an hrilhfiah bawk.
Quality Council of India team-te hi QCI hnuaia Swatch Bharat Mission Project Manager Pu Satendra Kr. Singha’n a hova. ODF District atana Champhai District endik tur hian Swatch Bharat Mission Project Lead Ankit Srivastava hovin Auditor dang pasarih - Abhishek Srivastava, Rakesh Kumar, Sumit Bajpayee, Hmanshu Kumar, Pushpesh Kumar, Rajkumar leh Ridip te an lo kal a ni.
