Workshop on Skill Development for Film Producers Cum Actor Training, I & PR Conference Hall a neih chu vawiin khan Pu Jim K.Chozah, Director, Information & Public Relations chuan a hawng.

I & PR leh Mizoram Film Development Society tangkawpte buatsaih vawiin Workshop ah hian khuallian Pu Jim K. Chozah chuan film lam chungchang zirna hun tha tak neih a ni leh tun hi a hmasa ber pawh a ni tawh lova, hetiang hun tha a lo inher thei thin chu lawmawm a tih thu a sawi a. Film siamtu leh changtu te, a thawktu hrang hrang te thawhrimna avangin tunah phei chuan Mizo film ten hma a sawn chho in an uluk chho zel a, dinhmun leh hmanrua thlir phei chuan a ropui tawh hle, a then phei chu beisei phak aia tha an nih hial thu a sawi.

Film hi khawvel in a buaipui in hnam hrang hrang kalphung leh hnam zia lantirna anih thu sawiin I & PR Director chuan zirna hian tawp in tai a nei lova, skill leh talent tha neih mai a tawk lo, chuvang chuan inthlahdah mai lovin mar pata tan a ngai a ni a ti a. Tunah Mizo te helam ah ke kan pen chho mek a ni a, tha thlah hauh lovin ngaihtuahna sen a ngaih thu sawiin, Workshop on Skill Development for film Producers Cum Actor Training chu tluang tak leh hlawhtling taka hmang tur in a hawng a ni.

Vawiin Workshop hi Pi Lallianpuii, Dy. Director, I&PR in a kaihruai a, MFDS te hmalak na hi kal chho ve zelin tunah chuan film siam chhuah te pawh a tha sawt hle a, hnamdang te pawh in Mizo film te hi an ngaihven sawt thu a sawi. Pu Lalsawmliana Pachuau, Adviser, MFDS in sawihawnna neiin member thar a lawmlut nghal a. Pawl anga awm chu a hlu in a tha a, mahse hmasawnna aiin pawl kan ngai pawimawh lutuk zawk palh ang tih a hlauhthawn awm thei a, pawl chhungah chuan lalna te leh thuneihna te a awm thin a, chung avang chuan hmasawnna a thuanawp thei a ni tiin pawl chhunga awm dan thiam a pawimawh thu a sawi.

Workshop hi nilenga hman chhunzawm nghal a ni.