Ministry of DoNER bultumin Mizoram Youth Commission hnuaiah hmarchhak state thalaite tana duan ‘Skill Development & Capacity Building Project’ chu vawiin khan MYC Training Hall, New Secretariat Complex, Khatla-ah Home Minister Pu R.Lalzirliana’n a hawng.

Director, LE&IT Deptt. leh MYC Member ni bawk Pu Lalhmachhuana kaihhruaiah Khuallian Pu R. Lalzirliana chuan MYC hnathawh fakin an hmalakna zarah Mizo thalai tam tak hna an hmu tawh bakah tuna training nei mek leh nei turte pawh state leh ram pawnah pawh hna hmu tlakin an chherchhuah ngei a beisei thu a sawi a. Tunlai khawvela thiamna bik ‘skill’ neite chuan hna hmuh an awlsam zawk tih sawiin training chhuah hnu pawha an hriatna leh thiamna tizau zel turin lehkhabu leh chanchinbu chhiar tam turin a chah. DoNER hnuaia skill development training-ah Mizo bakah thenawm hmarchhak state atanga thalai engemawzat an tel thei chu a lawmawm hle a, training chhungin tih takzeta bei tur leh mahni hnam ziarang theuh chhawm nung zel turin a hrilh bawk.

MYC Chairman Pu T.Sangkunga pawhin thu sawiin ‘Skill Development & Capacity Building Project’ atan DoNER chuan cheng vaibelchhe 2.51 a sanction a, tunah hian cheng vaibelchhe 1.88 chu MYC Account-ah lut tawhin training programme tan theih a ni, a ti a. He Project hnuaiah hian Mizoram, Manipur, Sikkim, Nagaland leh Assam atangin thalai mi 232 lak an ni a, training tur batch dang pawh tun atanga reiloteah lak leh thuai a ni ang, a ti. He Project bakah hian MYC hnuaiah UPCS leh SSC Coaching Centre hawn a ni bawk a, UPSC Coaching-ah mi 60 leh SSC-ah 150 chuang an inziak lut tawh a, hmun indaih loh avangin Dinthar-ah building luahin Coaching tan tawh a ni tih a tarlang bawk. MYC din tirh atangain thalai mi 1788 chu ramchhung hmun hrang hrangah hna hmu tawhin, mi 3640 chuan rampawnah hna an hmuh thawh thu a sawi a; tun hnai khan MYC hnuaia training zo mi engemawzat chu Jet Airways Cabin Crew, Ground Crew leh Security atan lak an nih bakah Hotel Hilton, Pune-a thawk tur mi 2 lak an ni tih a tarlang.

MYC Under Secretary Pu Lalsawmzuala chuan inhmelhriatna hun hmangin MYC hnuaia Project hrang hrang kalpui mekte a sawifiah bawk a. Hawnna inkhawm hi MYC Member Pu Nghaklianmawia’n lawmthu sawiin a khar.