Union Minister of Agriculture & Farmers’ Welfare Pu Radha Mohan Singh chuan nimin (18.06.2016) khan College of Horticulture, Thenzawl ami tur chu lungphum phumna hun Central Agricultural University Campus, Selesih-ah a hmang. He hunah hian Agriculture Minister Pu R. Lalzirliana leh Pu Lalthanliana, Horticulture Minister bakah Pu Ngunlianchunga, AH & Vety Minister, Parliamentary Secretary Pu Joseph Lalhimpuia, Pu RL Pianmawia, Dr. Ngurdingliana leh Pu Chalrosanga te an tel a ni.

Union Minister of Agriculture chuan College of Horticulture din tur chu Mizoram mai bakah India hmarchhak pumin an tangkaipui tur thu sawiin, hmarchhak state te hmasawnna tello chuan ram pum hmasawnna hi a khingbai a ni, a ti a. Mizoram chu Horticulture atan 11.56 lakh hectare lai hman theih a awm laiin tun dinhmunah chuan 1.10 lakh chauh hman tangkai ala nih thu sawiin, ram leilung leh sik leh sa in a zir avangin thlai leh theirah chinna hmun tha tak anih thu leh, tunlai thiamna nena hmalak anih chuan reiloteah Mizoram chu ram pum huapa horticulture products – thei, thlai leh pangpar tharchhuahna hmunpui leh thawnchhuaktu a la nih theih thu a sawi a. Chutih rualin ei tur kan tharchhuahte chu mihring ei atana thinghlim leh hrisel anih a pawimawh a tih thu sawiin Union Minister chuan leitha hman te duh tui turin leh, Sikkim chu organic state-a a inpuan tawh angin Mizoram pawh organic state anih ve thuai a beisei thu a sawi a ni.

Kawng hrang hranga Sorkar laipuiin hmasawnna hmalak hrang hrang sawilangin Union Minister Pu Radha Mohan Singh chuan kuthnathawktute eizawnna tihhmasawnna tura scheme hrang hrang awmte a sawilang a. Horticulture hmasawnna atana din Mission for Integrated Development of Horticulture (MIDH) anih rualin hemi hnuaiah vek hian India hmarchhak state-ah Horticulture Mission for North-East & Himalayan States (HMNEH) leh National Horticulture Board (NHB) hnuaiah thui tak hmalak anih tawh thu a sawi a ni.

Agriculture Minister Pu R. Lalzirliana chuan Sorkar laipuiin state mamawh hriaa a hmalak puina chu lawmawm a tih thu sawiin, College of Horticulture chu thangtharte tana tangkai tur mai bakah ei leh bara Mizoram tan intodelhna kawng sulsutu pawimawh tak anih a beisei thu a sawi a ni.

Horticulture Minister Pu Lalthanliana chuan College of Horticulture din chuan kuthnathawktutethiamna leh hriatna lo neih sa tibo lova belhchhah zawkin, tunlai thiamna nena ei leh bara hmasawnna siamtu tangkai anih abeisei thu sawiin, College building chu sak zawh thuai a nih theih nan Union Minister chu chak taka hmalakpuiah a sawm a ni.

Kumin July ni 15 atang hian Mizoram a College of Horticulture hnuaiah hian zirlai hmasa ber North East India state hrang hrang atangin 20-in class an tan dawn a. Thenzawl-a college building sak zawh anih hma hian CAU, Selesih ah class hi kalpui a ni dawn a ni.

Thenzawl College of Agriculture lungphum phunna hunah hian Prof. Premjit Singh, Vice-Chancellor, CAU chuan thusawina hun tawi a hmang bawk a. He hunah hian Sorkar hnathawk hrang hrang bakah kuthnathawktute leh thuthar lakhawmtute an tel a ni.