Champhai Chhungte Primary Agricultural Credit Co-operative Society (CSPACS) ten an din Champhai Higher Secondary School chu a building sakna tur lungphum Inrinni (13.2.2016) khan Champhai DC Pu Vanlalngaihsaka chuan a phum. He school hi kum 2013 khan din tan a ni.
DC chuan lungphum phum lawmna hun tawi buatsaihah thu sawiin, zirna kawnga hmasawnna chuan ram hmasawnna a thlen thei tih hre chiang CCPACS ten Champhai thalai te mamawh hriaiin higher secondary education din tura pawl sum neih ui lo taka school din nan an hmang chu lawmawm a tih thu a sawi a. Zirlaiten kawng mumal tak leh hlawhtlinna kawng kawhhmuh thei tura an thahnem ngaihna chu fakin, State chhung leh pawn mai bakah India ram tan mi tangkai tur he school hian a chherchhuah theih nan a duhsakna a hlan nghal a ni. DC chuan Champhai hian khualzin hip thei tur thing leh ngaw nalh tak tak leh boruak nuam tak bakah Pipute sulhnu hlu tak a neih thu a tarlang a. Tourism hmanga economy thang turin Champhai hian theih a neih thu leh, "Destination Champhai" tih vuahin mi hiptu ber a nih theih thu a tarlang a. Chumi ti hlawhtling tur chua mipui thiamna leh remhriatna a pawimawh thu te, mi thiam chhawrtlak neih tam a tulzia te a sawi tel bawk.
He hunah hian District Education Officer Pu Rodala pawhin thu sawiin, Champhai Higher Secondary School hi din nilo ta se admission changlo teirawlai mai mai an awm phah nual dawn nia a hriat thu a tarlang a. Zirtirtute hnenah chuan mahni ke a intungding a eizawng thei ngei turin zirlaite hnenah thiamna pe se a duh thu a sawi a. School dintu Society-te pawhin kawng hrang hrangah hma sawn belh chho zelin, hlawkna nasa zawk an la hmuh a beisei thu a sawi a. Society chu tluang taka kal tur chuan member-te zingah rinawmna vawn nun pawimawh a tih thu sawiin, mimal hlawkna um liva lungrual takin thahnemngai taka thawk zawm zel turin a duhsakna a hlan a ni.
Thusawitu dang Pu Zaliankhuma, ARCS chuan society din in khawtlang tana tangkaina hrang hrang a thlen theih dan leh state dangah pawh hlawkna tha tam tak an tel thu a sawi a. CCPACS pawh farming society mai nilovin multipurpose society ah thlak tum mek a nih thu tarlangin, huam zau zawka hmalak a nih phah ngei theih a rin thu a sawi bawk.
Kum 2014 a din a nih atang khan Champhai Hr. Sec. School-ah hian kumin thleng hian zirlai 429 an in enroll tawh a. Thawktu zingah Teaching Staff pakua awmin, Non-Teaching Staff pahnih an awm a ni.
CCPACS hi kum 2013 khan din a ni a. Tun dinhmun ah member 84 awmin, Pygmy deposit tlingkhawm atangin mi 200 chuang hnenah cheng nuai 300 chuang agriculture and allied activities atan Society hian loan a pe chhuak tawh a. Champhai khaw chhungah bungraw man tlawm zawka lei theihna tur variety store (wholesale leh retail) a din bawk a ni.
