Kum 2018 a Serampore College in kum zahnih a tlin lawmna tura lo inpuahchah lawkna programme pakhat, Council of Serampore College in ‘Well-Wishers’ Seminar on the Mission of Serampore College’ tih vawiina Synod Conference Centre a a buatsaih ah Chief Minister Pu Lal Thanhawla chu khuallian a ni.

Chief Minister chuan Serampore College nen hun rei tawh tak inkungkaihna an neih thu sawiin, a mikhuallo hle a ni a ti a. Council of Serampore College in he hun hmanpui tura an sawm chu lawmthu a sawi a. India ramah Krista zawmtu kan lo tam chhoh zel theihna turin a sulsutua kan tan a pawimawh hle a ni a ti a. Mizote hi khawvela sakhua lian ber ber pathum Hindu, Buddhism leh Islam ten min hualbet chung pawhin Pathianin a chanchintha hril turin min rawn zawngchhuak a, a Hming ti ropui zawnga kan kal a tul a ni a ti. Eng hna pawh thawk ila kan awmna theuh hi A rawngbawl tura min dahna a ni a, chuvangin midangte tana malsawmna thlentu nih kan tum tur a ni a ti.

Pu Lal Thanhawla hian ‘Friends of Serampore College’ tih hawnga tlangzarhinn a hming sign hnanin a hming chuang hmasa ber ani chu lawmthu a sawi a. Friends of Serampore College hi kohhran hrang hrangte phuarkhawmtu ni tura beisei a ni.

Serampore College hi India rama Theology zirna University awmchhun a ni a. Theology bakah Arts, Science leh Commerce subject te zirna a awm bawk a ni.

Rev. Dr. Santanu Kumar Patro, Registrar, Senate of Serampoe College chuan theology sawi apiang hian Mizoram hi a lang hmasa thin a ni a ti a. Mizoram leh Serampore College hi chhulkhat chhuak angah kan ngai a, Mizoram hi kan ngaipawimawh em em a ni a ti.

Thusawitu dang zingah Rt. Rev. Dr.John S.Sadananda, Master of Serampore College, Dr.Vansanglura, Principal, serampore College te an tel a ni.

Seminar hi Rev. Dr. Lalchungnunga, Serampore College Principal lo ni tawh leh Chairman, MBSE ni bawkin a kaihruai a ni.

Hetiang seminar hi state dang dangah la neih chhunzawm chhoh zel a ni ang.