Pachhunga University College-in a buatsaih ni khat awh Aizawl Science Conclave – 2016 chu PUC Auditorium-ah Finance Minister Pu Lalsawta’n vawiin khan a hawng.

Hawnna inkhawmah hian Khuallian Pu Lalsawta chuan, zirlaite phurna nasa tak pe thei tur chuti ang hun buatsaih a ni chu lawmawm a tih thu a sawi a. Career-a kawng dik zawh tura duhthlanna dik siam thiam a pawimawh thu leh tunlai zirlaite chu classroom, laboratory leh zirtirtu tha tak tak an neih avanga an vanneihzia sawiin, Science hi thil mak leh ropui tak tak hriat chhuah theih nana zirna peng pawimawh tak a ni, a ti a. Zirlaite chuan Mizoram ropui nan leh hmasawn nan tih theih tam tak an nei a, an kutah Mizoram hma lam hun a awm a ni tiin, Finance Minister chuan ram tana an theihna zawng zawng senga thawk turin zirlaite chu a chah a ni.

Aizawl Science Conclave hawnna hun hi PUC Principal Dr Tawnenga’n a kaihruai a. Kal khawmte lawmna thu sawiin, an programme chu Department of Biotechnology, New Delhi-in kum sawmthum (30) a tlin hriat rengna leh lawmna chi khat atana DBT-in an sponsor a nih thu a sawi.

Programme Co-ordinator Dr H.Lalthanzara’n Aizawl Science Conclave – 2016 buatsaih a nih dan report pein, programme-in a tum ber chu zirlaiteah Science zir bingnaa hriatna leh thiamna nghet leh ril tak tuh leh an thiamna leh theihna te pho chhuah theihna tur buatsaihsak a, hma an sawn zel theih nana tanpui a nih thu a sawi a. Chu chuan an hma lam hun atan kawng zau tak sialsakin, ram tan rah tha a chhuahtir dawn a ni, a ti.

He hunah hian Mizoram sawrkar Department of Science & Technology-a Chief Scientific Officer Dr RK Lallianthanga chu resource person niin, “Emerging Trends in Basic Sciences” chungchang a zirtir a. Intihsiak nana zirlaite’n Science Model leh Research Poster an siamte pho chhuah niin, Science Quiz buatsaih a ni bawk.