Vawiin khan Health & Family Welfare Minister Pu Lal Thanzara chuan Valentine’s Day puala Association for Voluntary Blood Donation (AVBD)-te buatsaih thisen pek runpui ‘Blood for Your Valentine’ chu Aizawl Civil Hospital Auditorium-ah a hmanpui.
‘Blood for Your Valentine’ programme tanna inkhawm, Aizawl Civil Hospital Auditorium-a neihah thu sawiin Health Minister Pu Lal Thanzara chuan Mizoram hi thisen pekna atana Valentine’s Day hmang hmasa ber a nih hial a rinthu sawiin,“Thisen pek kawngah India ram tan mellung pawimawh tak Mizoramin a siam a ni,” a ti a. Hetiang programme tha duang chhuaktu Zikpuii leh AVBD hruaitute chu fakin, a hlawhtlin theih nana thisen pe thin tute leh tha leh zung, sum leh pai thawhtute chungah lawmthu a sawi bawk. Mizoramin kum 1992-a a thlawna thisen pek a kalpui tan atangin kawng hrang hrangah nasa takin hma a sawn tawh a, a pawimawh ber erawhchu thisen petute an ni fo tih sawiin, thisen pe tura kal khawm thalaite chu an hlu takzet a ni, a ti a. Mizoram vanneih em emna pakhat chu thisen pek intihhmuh hi a ni tiin tlawmngai pawl hrang hrang leh kohhran thalaite leh zirlai/NSS Volunteer-ten an uar chho zel chu a lawmawm tak zet a ni, a ti bawk. Minister chuan kum khat chhunga Mizorama thisen mamawh chu tunah unit 23,000 vel ni mahse mihring pung zelah mamawhna a san belh zel avangin thisen petu pawh kan pun zel a ngai a ni tiin thalaite chu thisen pek uar lehzual turin a sawm a, “Mi ten tlawmngaia an pek, thisen dawngtu nih hi a lawmawm hle a, chu ai chuan a petu nih hi a lawmawm lehzual a ni,’ a ti bawk.
‘Blood for Your Valentine’ programme hawnna inkhawm hi Aizawl Civil Hospital Medical Superintendent Dr. Rosangluaia’n a kaihruai a. AVBD General Secretary Pu C. Lalnunnema chuan ‘Blood for Your Valentine’ puala thisen pek a nih tawh dan report a pe a ni. Secretary Report-a a lan danin nikum thlenga Valentine's Day puala thisen pek tawh zat hi Unit 3368 a ni a. Blood donation Camp vawi 23 huaihawt a nih tawh thu leh kum 1992-a athlawna thisen pek kalpui a nih atanga kum 20 chhungin athlawna thisen pek hi za-a 90-ah a chho hman a ni tih tarlan bawk.
He inkhawmah hian MSACS Project Director Dr. Lalmalsawmi Sailo pawhin thutawi sawiin thisen pe thei tura thisen thianghlim neite chu an thisen vawng zel tura chahin, "Vawikhat humsual dai palh vangin thisen hlu tak kha thisen tihbaiawm takah a chang thei tih hre reng rawh u," tiin thalai kalkhawmte a chah bawk.
AVBD chuan regular taka thisen pe, Mipaah chuan vawi 50 aia tam pe tawh leh hmeichhiahah chuan vawi 40 aia tam pe tawhte chawimawina thuziak a hlan a. Mipaah chuan vawi 60 thisen pe tawh Tv. C. Lalremruata leh vawi 58 thisen pe tawh Tv. R.C. Rokhum hnenah hlan a ni a. Hmeichhiaah chuan vawi 44 thisen pe tawh Pi Rebecca Saimawii leh vawi 41 thisen pe tawh Pi Zothantluangi hnenah hlan a ni bawk.
‘Blood for Your Valentine’ programme hi Zikpuii huaihawtin 2010 Valentine's Day khan Aizawl Civil Hospital Blood Bank-ah hman tan a ni a. Hemi hnu hian kumtin kalpui a nih bakah tunah chuan Districts hrang hrangte pawhin an kalpui ve tawh a ni.
