Vawiin chawhnu khan Education Minister Pu H. Rohluna leh Parliamnetary Secretary Pu Joseph Lalhimpuia te chuan Mizoram Board of School Education (MBSE), Chaltlangah lehkhabu te (booklet) an tlangzarh.
Education Minister chuan ‘Integrated Evaluation Scheme for Secondary Stage’ tih lehkhabu te a tlangzarh a. He Scheme hi Mizorama zirtirna kalphunga rahbi pawimawh tak a ni tiin, kum 2016-17 atanga kalpui nghal tum a nih thu a sawi a. Beisei aia hma a peihfel theih a ni chu lawmawm a tih rualin theihtawp kan chhuah tlanna rah a ni, a ti bawk. Khawvel changkang zel ah kan zirnate thlak danglam ve zel a ngai a, he scheme thar hian kan zirtirtute leh zirlaite hnenah hmasawnna thar a pek belh a beisei thu a sawi a. Zirna ngawr ngawr piah lamah infrastructure thar te kan ngaihtuah belh mek zel a ni a ti bawk.
Parliamentary Secretary chuan ‘General Studies for Higher Secondary Schools’ tih lehkhabu te a tlangzarh ve thung a. Zirlaite tana zirlaibu pangngaia hmuh mai tur awm ve lo - dan lampang, disaster management, road safety, traffic sign, cyber security leh a dang dangte chu mithiamten ngun taka an zirchian hnuah buatsaih thei a ni chu lawmawm a ti a. Chanchinbu lamahte mi thahnem takin textbook piah lama in zirtirna kan mamawh an lo tih fo thin hre reng a siam a ni a ti bawk. State dangah chuan zirlaiten mark sang tak tak an hmu a, kan zirlaiten ram danga admission tih ve an tumin mark hniam zawk an hmuh avangin admission hmuh an harsat phah thin a, he Integrated Evaluation Scheme thar hmang hian zirlaite harsatna thui tak a sutkian theih a beisei thu a sawi bawk.
MBSE Chairman Dr. Lalchungnunga’n Education Minister, Parliamentary Secretary leh School Education hnuaia staff zawng zawngte thawhhona boruak tha avangin Mizoramah kum hnih lek chhunga zirna hmel a danglam thei chu lawmawm a ti a. Hlawhtlinna an neih apiangte an lo hriatpui thin chuan a chawk phur lehzual a ni a ti bawk.
Lehkhabu tlangzarhna hun an hman zawh hian Minister kaihhruainain Integrated Evaluation Scheme for Secondary Stage sawi zau turin committee an thukhawm a. School Education Secretariat, Directorate, MBSE, SCERT, HISSLAM leh MISSTA-te aiawh in committee-ah hian an tel a ni.
