Chief Minister Pu Lal Thanhawla chuan vawiin khan Ukhrul, Manipurah Naga kut ‘Lui-Ngai-Ni’ a hmanpui. ChiefMinister chuan Maniput United Naga Councilin kut hmanpui tura an sawm chu lawmthu a sawi a.

Manipura Naga hnam hrang hrang ziarang pholan nana kum 30 laia upa ‘Lui-Ngai-Ni’ kut chu Manipur sorkarin hriatpuia sorkar chawlha a puan avang leh Central sorkara Ministry of Tourism pawhin a hriatpui a ni chu a lawmpui thu a sawi a. United Naga Council hmalakna hi fakawm tiin hnam hrang hrang te inkarah inunauna tha leh inhriatthiam tawnna thlentu pawimawh tak a ni thei a ti a. Chutiang ni tur chuan duhsakna ka hlan a ni a ti.

Chief Minister chuan Ukhrul a a kal thei chu lawmna chhan pawimawh tak pakhat aneih thu sawiin, kum 1896 ah Sap Missionary te Manipur leh Mizoramah a ruala an lo chhuah kha ni a ti a. Manipurah Rev William Pettigrew leh Mizoramah Rev J.H.Lorrain leh Rev F.W.Savidge te an ni a. Chanchintha leh Kristianna hian Naga te leh Mizote hi min pawt khawm niin ka hria a ni a ti a. Ukhrul atanga intanin Manipur hmun dangah kristianna alo darh chho ta zel a, hemi avang hian Pathianin Tangkhul hnam hi mal a sawm bik nia a hriat thu a sawi a. Central leh state sorkar ah hna sang tak tak thawk an awm bakah hmarchhak state a tribalte zingah Tangkhul mi High Court Chief Justice ni thei hmasa ber an ni chu a ropui hle a ni a ti. An ni bakah Manipur Chief Minister lo ni tawh engemawzah an neih tawhah Manipura chengte tan an thawhhlawk hle a, a lawmawm hle a ni a ti.

Chief Minister chuan Kristian kan nihna hian remna leh muanna siam kawngah thui tak mawhphurna min pe a ni a ti a. Naga hnamzia leh an khualchhawn dan atang te hian zir tur tam tak kan neiin ka hria tiin, hnamah kan chian a, hnam inpumkhatna ngaipawimawh turin mipuite chu a sawm a. Hnam thilah emaw, lamah ani emaw, kan kristianna ah a ni emaw, intlawh tawn fo hi inpumkhatna atan a pawimawh hle a ni a ti. He Kut hian hmasawnna duhawm tak, muanna leh hlimna thlentu ni turin duhsakna a hlan a ni. Lui-Ngai-Ni Kut hi kum 1986 khan Manipura Naga hnam peng Thangkhul, Kabui leh Mao ten Buh leh Thlai Tuh Kut (Seed Sowing Festival) tiin an lo hmang tan a.

Lui-Ngai-Ni tih pawh hi heng hnam pathum tawng atanga lak a ni. Chief Minister chuan Naga te hian lam hmuhnawm tak tak thahnem tak an neih thu sawiin, Kabui Naga lam phei chu khawvelin a hre hle a ni a ti.

Chief Minister hi tukin khan helicopterin Ukhrul hi a pan a, chawhnu khan helicopter bawkin alo let leh a ni. A nupui Pi Lal Riliani leh Pu P.L.Thanga, State Planning Board Member Secretary ten an tawiawm a ni.