Vawiin khan Champhai DC Pu Zoengsanga chuan BRTF ten Champhai leh Seling inkar kawng an siamthat chu a hmunah chipchiar takin a enfiah a. Kawng siamthat hi kum thum (3) chhung daih tura tih a nih avangin DC chuan a tha thei ang bera thawk turin BRTF-te chu a chah a ni.

BRTF te hian kawng siamthat hna hi tunah hian Tuipui bulah thawk mekin, helai hmun atanga Champhai lama km 2 thleng chu resurface tur a ruahman a ni a. Pu Zoengsanga chuan BRTF-te chu hna a tha thei ang bera thawk turin a chah a. Resurface hi ruahman dan chuan centimetre 2-a chhah tur a ni a, DC chuan centimetre 4 tal a nih theihna turin Pushpak-a ngenna thlen a tum thu a sawi a ni.

Tuipui bul kawng bakah hian BRTF ten Khawzawla leitla hniam an siamthat leh Khawzawl kawna siamthat hna an thawh mek chu en bawkin, hna kalzel dan tur te BRTF hruaitute chu a sawipui bawk a ni. Vawiin hian DC hi PWD Department bakah Sub-Hqrs YMA leh Champhai Joint VC President Pu K. Lalmawia ten an tawiawm a ni.