Chhimtuipui lui kaina tur, 'Darzokai'-a thirhruia khai lei (suspension bridge) dawh mek chu vanduaithlak takin December 13, 2014 chhun dar 12:45 vel khan a chim hlauh mai a. Hetiang vanduaina thu hriat anih ve leh Lunglei atangin a bialtu Superintending Engineer Er.Vanlalchhuana leh Executive Engineer Er. Lalchhuana chu a hmun panin an kal vat a. Aizawl atangin Bialtu MLA Pu John Siamkunga pawhin a hmun a pan ve nghal bawk a.

Hnathawktute chhun thingpui in tura an chawl tur, a then lei atanga an kal chhuah hnuah la chhuak ve hman lo mi 10 a chim hnan a. An zinga 6 chu hnam dang niin, 4 chu tualchhung mi an ni. Hliam zinga hnamdang pakhat chu Hnahthial Damdawi In panpui laiin a thi a. Pakhat chu first aid pek hnuah chhuahtir a ni a; na zual deuh 3 chu Aizawl Civil Hospital, a dang 2 chu Lunglei civil hospital leh a bak 3 chu Hnahthial hospital-ah dah an ni. Heng hliamte chhanchhuah leh chhawmdawl hna hi Tuipui D leh a chhehvel mi lo awm apiangin theihtawp chhuahin, Mizo tlawmngaihna rilru dik tak puin an thawk nghal zung zung a. Hetianga chhanchhuah hna thawktute chunga hian Mizoram sorkar chuan lawmthu a sawi rualin, thihna hial tawk hliam tuarte a tuarpuiin pawi a ti tak zet a ni.

A chim chhan tak hi chiang taka sawi mai theih a ni hrih lo nain, Lei khaitu thirhrui lian, a sir tawna 4 ve ve, khawmual lama thlun nghehna (Anchor) khawthlang lam a mi zawk a inbat, a hmawr thleh hnua chep/clip nghet tur chu, lei level siam dik tura la siamrem(adjust) leh ngai anih avangin a nih dan tur angin an la kilh nghet tawk lo niin a lang a. Hetiang anih avang hian lei dawh mek chungah pawh mi tam tak awm phal a ni lo reng a. Khawthlang lam zawk a mi, a sir khat a hrui 4 leh lehlama a then hmawr ralna lo nghet tawk lo vanga put ta chuan a tichim niin a lang.

He jeepable suspension bridge, metar 200 a sei, cheng nuai 266.21 man tura ruahman hi, a sei em avang leh hna khirh khan bik (specialised job) anih avangin hetiang lam thawk thanga ngaih S.Guha Niyogi & Associates, Kolkata chuan a thawk a. Harsatna hrang hrang avanga beisei anga zawh anih loh hnuah December 20, 2014 a motor zawh kai theih tura zo turin ngawrh taka thawkin zo ngei tur a hma lak mek lai leh, a bikin tuipui ral mipuiten nghakhlel taka an thlir laia hetiang beisei loh leh hisap loh lam thil lothleng thut hi a vanduai thlak a, sorkar chuan pawi a ti tak zet a, a chhiat dan ngun taka enfiahin Public Works Department chuan a dawh that leh dan tur ruahmanin hmaa la thuai dawn a ni.