Ni 2 awh tur Public Health Engineering Department Mid Term Review Meeting chu vawiin khan PHE Minister Pu Zodintluanga hovin Aijal Club ah tan a ni.
Minister chuan PHE department-in mipui hnena tui in tur hnianghnar pek thupuia neia mipui tana an hmalakna ah lawmthu a hrilh a, department a enkawl chhunga an hnathawh thlirletna review meeting hman hmasak berah chuan, kum tam tak kalta atanga an hnathawh dan zui ringawt lova, tih dan thar leh tha zawk lo chhuak zel karah engtin nge tha zawk leh hlawk zawka hma an lak chhoh zel ang tih ngaihtuah hova, hlawk taka meeting an hman a beisei thu a tarlang a, meeting chu intuaithar nana hmang tangkai theuh turin PHE Officer kalkhawmte chu a sawm bawk. Mizorama khaw hrang hrangte tana tui in tur pekna tura department-in hma an laknaa an sum sen leh a rah te chu a inmil em tih ngun taka chhuta, scheme thenkhat hlawhtling tluantling lova zuih ral ta awm thin te chu tihbo a nih theih nan fimkhur zawka ruahmanna te kalpui thin turin a chah bawk. PHE department hnathawh hrang hranga contractor te hna thawh dan chu a tir atanga vil ngun turin a fuih a, officer te chu a tul huna khauh ngam thin turin a chah bawk. An hmalakna te chu zep leh inthup awm lova langtlang taka kalpui thin tura chahin kalphung thara thawk turin a fuih a, department leiba tam tham tak te chu tihhniam a nih theih nan nasa zawka tan la turin a chah bawk. Sawrkar hmalakna leh duhdan te bawhzui tha leh tha lo hriatchian nan Minister chuan Mizoram puma division tin hmalak dan leh sum hman dan te chu a hnenah thehlut theuh turin a hriattir nghal bawk a ni.
Khualzahawm Parliamentary Secretary Pu Hmingdailova Khiangte pawhin tui harsatna Mizorama mipui te tana tui pek hna hautak tak thawktu te hnenah lawmthu hrilhin an thawhsak mipui hmangaihna thinlung nen tih tak zeta thawk chhunzawm zel turin a fuih bawk.
PHED Mid Term Review Meeting hawnna inkhawm hi PHED Secretary Er. Lianchungnunga’n a kaihruai a, Review Meeting chu an department hmalak dan te a that tawk leh tawk loh thlirlet nan leh tih dan tha zawk ngaihtuah ho nana ruahman a nih dan te a sawifiah a. Mihring tana pawimawh ber tui ngaihtuahtu department an nih anga khawtlang tana an hnathawh leh mawhphurhna pawimawh zia hre reng chunga ram tan thawk chhunzawm zel turin PHE department officer rual te chu a chah a, a tul anga an ruahmanna leh hmalakna te ennawna her danglam hreh lo turin a fuih bawk.
Mid Term Review Meeting ah hian Mizoram puma Division hrang hrang atangin PHE department officer te an kal a, Minister ho hian Division tinin an hmalak mek dan leh an harsatna tawh te report pe-in hmalak chhunzawm zel dan tur te an sawiho a ni.
