Nikhat awh tur Cyber Crime & Cyber Security Awareness Workshop chu vawiin chawhma dar 10:00 khan DIET Training Hall-ah neih a ni. Sorkar hnathawkte tana buatsaih a niin Pu Zorammawia, IGP in a hmanpui.

Workshop hawngtu khuallian Pu Zorammawia chuan Cyber Crime awmzia chu computer leh a kaihhnawih khawl hmanga pawi khawihna a niin a huam zau thu leh computer, mobile phone, CD, Print Media leh Information Technology in a huam ang chi reng reng a ni a ti a, chung ang lo hmang khaw lo, mi pawisawina chi hrang hrang mi computer lo hack sak, mi bank account lo khawih a pawisa hman sak/lak sak, mobile phone hmang a mi vau leh tihhmingchhiat, facebook hmanga thil sual tih etc. thin te chu cyber criminals (misual) an ni a. Hremna Dan mumal tak chhawpchhuah reng a nih thu sawiin IGP chuan chatting hi mi tam tak chinghnia beram vun sina midang bum theihna a ni a, mahni chanchin tarlang tam lo turin hetiang hmang thin te a chah a, chian loh te chu accept lo tur leh mahni tana pawi leh zahna tur tarlang lova, lucky tickers etc. vanneihna dawn thu ang chi te ngaihsak miah loh tur a ti bawk a. Hetiang zirna hun tha an neih chu hmang tangkai tur leh an hriat loh te hriat nan a rilru pe turin khuallian chuan kalkhawm te chu sawmin workshop chu a hawng nghal a ni.

Pu Lalnuntluanga Principal, DIET chuan tunlai khawvelah hetiang lam a pawikhawihna a tam tawh avanga inven a tul thu leh mobile phone, computer, laptap etc. hmang hian kan hriat lohin pawi (crime) khawih thei reng kan ni a, a tuartu ngei pawh kan nei thei a ni tiin fimkhur a ngaihthu a sawi.

Govt. of India buatsaih vawiin programme ah hian Pu Deba Chandra Singh, Director, NIECIT Aizawl, Pu Lalrempuia Sailo, Deputy Engineer NIECIT Aizawl leh Pu J. Lalmuankima, Addl. SP CID Crime ten hriattur pawimawh tak an zirtir a. Computer set hi naupangten an room a tawmbo pui mai a him loh dan leh hmun ualau ah dah a, enge an tih thin hriatpui a ngaih thu leh inhlei nana hman mai chi anih loh dante sawiho a ni.

Kum 2009 - 2014, November (kum 6 chhung) hian Mizoramah Information Technology Act 2000 tlawh chhanin case 46 ziah luh a ni tawh a ni.