Vawiin chawhma dar 11 khan Venglai Community Hall hnuai zawkah District Disability Committee kaihhruaina hnuaiah Champhai khawpui chhunga pianphunga rualbanlo (disabled persons) mi engemaw zat hnenah bengdar, tiang, wheel chair a thlawna semchhuah a ni a. He inkhawm Pu R. Zarsosanga, Addl. DC kaihhruai-a neihah hian heng hmanraw tangkai tak tak te hi Champhai  DC Pu Vijay Kumar Bidhuri, District Disability Committee Chairman ni bawk chuan rualbanlote hnenah hian a sem chhuak a ni.
Thusawiin DC Pu Vijay Kumar Bidhuri chuan, tunlai hunah chuan rualbanlo (disabled) hi an awm tawh tak taklova, an theihna leh an tangkai dan a dang tawh mai zawk a ni a ti a. Champhai district hi rualbanlote zawnchhuah  leh an tana chhawr tangkai theih tur hmanraw pek kawngah hian sulsutu kan ni a, hemi kawngah  campaign nei hmasa ber kan ni a ti. Tun dinhmunah Champhai district chhungah hian rualbanlo enfiah tawh mi 235 hnenah certificate pekchhuah a ni tawh tih tarlangin, rualbanlo certificate mamawhte chuan min rawn pan ula, a theihna kawng apiangah kan lo pui ang che u tiin rualbanlo kalkhawmte chu a chah a. Sorkar Laipui hian rualbanlote hi a ngai pawimawhin a ngaihven hle a, central hnuaia scheme hrang hrangah pawh hian anmahni tana hamthatna awm thei tur ang chi chu pe tur leh an tan reservation pe turin a ti a. Mirethei In sak saknatur IAY scheme-ahpawh rualbanlote tan hian za zela 3 (3%) dahsak (reserve) tura a tih angin kei pawhin hei hi tihhlawhtlin ngei ka tum a ni a ti. He hunah hian Dr. Lalthanga, Sr. Medical Officer chuan kawng hrang hranga rualbanlote tana Sorkar Laipuiin hamthatna awm thei a ruahman te chu kan DC hmalakna in tunah hian sem theihin peihfel a ni ta a ni, tiin a lawmthu asawi bawk.

Rualbanlote hnenah an mamawh pekchhuahna inkhawmah hian rualbanlo kalkhawmte hnenah beng dar 34, mitdelte tana tiang hawl tur (Walking stick) 7, Kebai te hawl tur tiang (Braille stick) 7 bakah wheel chair 5 sem chhuah a ni. Champhai District chhunga Social Welfare Department CDPO 3 te bial chhungah Rualbanlo te hmanrua hi sem ala ni leh dawn a, an bialtu CDPO theuhte atanga semchhuah tura pekchhuah a ni ang a. Chungte chu :
Champhai ICDS ah - Bengdar- 30, Wheel chair - 5, Braille stick-5.
Khawzawl ICDS ah - Bengdar - 3, Wheel chair -1.
Khawbung ICDS ah - Bengdar - 8

Heng rualbanlote tana hmanraw tangkai leh pawimawh te hi a thlawna semchhuah niin, Social Welfare Department kaltlanga rualbanlote tana hmanraw tangkai siamchhuaktu company ALIMCO,  Guwahati ten aN rawnpek a ni.