1496/2022-2023
Champhai, the 8th August, 2022: State Election Commission thuchhuah angin Champhai Dinthar VC by-election neih tur a ni a. Hemi atana inpuahchahna kalzelah vawiin chawhma dar 10:00 khan District Election Officer, Pu James Lalrinchhana chuan Champhai Dinthar VC by-election final electoral rolls, 2022 chu DC Conference Hall-ah a tlangzarh a, bu hnih theuh political party aiawh leh NGO hotute hnenah a hlan nghal a ni.

District Election Officer Pu James Lalrinchhana chuan Dinthar VC by-election inthlanna neih tura final electoral roll hun bi ruat ang thlapa kalpuia tlangzarh a ni ta chu lawmawm tiin, final roll felfai leh tha tak, roll punna pawh danin a pawm chin peihfel a ni chuan dik leh felfai taka kalpui a nih zia a tarlang a ni, a ti a. Hemi kawnga election buaipuitu, political party leh NGO hotute inpekna leh thawhhona chu fakawm a tih thu a sawi a ni.

Pu James Lalrinchhana chuan khawtlang rorelnaa a hnarkaitu bulpui ber VC thlanna tura pawimawh tak VC electoral roll chu ngaihpawimawh a tul thu a sawi a. Electoral roll-te chu mipui thlan Sawrkar, democracy bultanna leh ngelnghet taka din a nih theihna kawnga tangkai tak a nih thu sawiin, electoral roll dik leh felfai nei turin political party leh NGO te tawiawmna a ngai a ni, a ti a. Danin vote nei thei tura a tihte electoral roll-a an chuan ngei theih nan leh electoral roll dik, felfai leh thianghlim tak vawn a nih theih nan kan zavaia thawhho a tul a ni, a ti bawk.

Assistant District Election Officer Pu Lalnunfela Chawngthu hnen atangin final roll tlangpui ngaihthlak a ni a. Final electoral roll tlangzarh a nih hnuah VC by-election neih hun tur chungchangah State Election Commission atanga thuchhuah ngaihchan a nih thu a sawi bawk.

Vawiina Champhai Dinthar Veng final electoral roll tlangzarh takin a tarlan dan chuan tun dinhmunah Champhai Dinthar Vengah hian vote nei mi 652 an awm a; heng zinga 292 hi mipa niin, a dang 360 te chu hmeichhia an ni a, hmeichhe vote nei hi 68 in an tam zawk a ni. July ni 26, 2022 a draft electoral roll tlangzarhah khan vote nei mi 649 (Mipa 294 leh hmeichhia 355) an awm a, heta tang hian roll siamthatna hun hawn a nih hnuah lut thar mi 12 (Mipa 3 leh Hmeichhia 9) an awm laiin, roll atanga paih mi 9 (Mipa 5 leh Hmeichhia 4) an awm thung a. Electoral roll-a lut thar 12 te hi EPIC (Voter ID) nei sa, hmun dang atanga rawn pem lut te an ni a. Electoral roll atanga paih 9 zinga 8 te hi mitthi an ni a; 1 dang hi roll-a chuang nawn double entry a ni. Draft electoral roll atanga final electoral roll punna hi vote 3 niin a punna hi za zela 0.46 (0.46%) a ni.

Champhai Dinthar Veng hian VC seat 5; General seat 4 leh Reserved seat 1 a awm a. VC member 1, General seat atanga tling a ban tak avangin he seat bik hnawhkhat tur hian inthlan buatsaih tur a ni a.

He hunah hian AERO, DIPRO, Dinthar VLO, Political party aiawhte leh Dinthar Veng NGO hotute an tel a ni.