Vawin chawhma khan Champhai DC Conference Hall-ah Champhai Dinthar veng a UPC North East India (NEI) leh Dinthar NGO, VC ram buai chungchang ngaihtuahin thutkhawm a ni.

Meeting-ah hian UPC NEI, Dinthar VC leh NGO aiawhte hnen atangin insawifiahna hun siamsak an ni a. UPC NEI-in helai ram neitu nihna Land Lease No. Mise 54 of 1998 an neih chu a dik ngei a ni tih Settlement Officer, Champhai atanga finfiah anih thu leh UPC NEI hian kum 2017-2018 thleng pawhin chhiah an chawi thu tarlan a ni.

Helai ram ruak anga hria a In lo sak tawh MUP, MHIP, VC, Waiting Shed bakah Anganwadi-te chuan ram neitu nihna document engmah phawrh tur an neih loh avangin ziaka insawifiahna leh thu thlen duh an la nei anih chuan March Ni 27, 2019 ral hmaa thuneitute hnena thlen tura hun pek leh an ni a. Dinthar NGO leh VC ten chhanna an thehluh zulzuiin hmalak zel dan tur State Government-ah thlen a ni ang a, State Government thutlukna a zirin District Administration-in hma a la dawn a ni.

March Ni 4, 2019-a Dinthar khawtlang ten UPC NEI Biak In sakna tur ban phun hnatlang a an thiah sak avanga UPC NEI-in Deputy Commissioner, Champhai hnena thu an thehluh kalzelah March Ni 7, 2019 khan DC Conference Hall-ah District Bawrhsap hova meeting neih a lo ni tawh  bawk.

Vawiin Meeting-ah hian Champhai Bawrhsap Dr Naveen Aggarwal; Pu Lalthiamsanga Sailo, SP Champhai; Pu Liansangzuala Chhakchhuak, Addl DC Champhai; Pu Remlalliana Hnamte SO; Dr Lallawmkima DIPRO; Pi WC Zorammawii, CDPO; Pu VL Chama Hnamte, President Sub-Hqtrs. YMA Champhai, Champhai Dinthar Veng VC, NGO aiawh leh UPC NEI hotute an tel a ni.