Nimin tlai khan Entrepreneurship Knowledge Centre, ZIDCO Building-ah February Ni 25, 2019 atanga neih tawh ‘Construction Supervisor Course’ training kharna hun hman niin Planning Secretary Dr. C.Vanlalramsanga chu Khuallian a ni a. Training hi Entrepreneurship Knowledge Centre (EKC)-Mizoram State Entrepreneurship Development Monitoring Committee (MEDMOC) leh Central YMA buatsaih a ni.

Khuallian Dr. C. Vanlalramsanga chuan mizo thalai leh kuthnathawk ten construction sumdawnna eizawnna puilting atana an hman theih nan leh helama inhrilhhriatna zau zawk neihna atan training hi buatsaih a ni, a ti a. Tun dinhmunah hian Construction sumdawnnaah hian sum lut leh chhuak a tam viau a, Gross State Domestic Product (GSDP) ah pawh construction sector hian a thawhhlawk hle a ni tiin contruction sector hi Mizoramah lian telh telh tura rin a ni a, hemi lama thiamna neih hi a pawimawh chho dawn a ni, a ti a. Thiamna a pawimawh rualin taihmakna leh rinawmna a tel a ngai a ni tiin kalkhawmte chu a fuih a. Ram tana an thiamnate hmang tangkai zel turin duhsakna a hlan a ni.

Training-ah hian District hrang hrang atangin mi 28 an tel a. Training petute hi MZU, ZIDCO leh Land Revenue & Settlement Department atangin mi thiam tak tak an ni a. Construction kaihhnawiha pawimawh te, khawl hman dan dik te, insak dan him leh tha zawk te, dan kaihhnawih thil thlengin zirtirna kalpui a ni. He course hi Entrepreneurship Development Scheme (EDS) hnuaia Entrepreneurship Skill Development Programme zinga pakhat a ni a. EKC-MEDMOC hnuaia ‘Construction Supervisor Course’ training chhuak mi 58 an awm tawh a ni.