Mizoram Upa Pawl Kolasib Sub Headquarters chuan vawiin khan Diakkawn YMA Hall ah Assembly vawi 14-na an hmang a. Pu Zoengsanga MCS, Kolasib District Bawrhsap chuan khuallian niin a hmanpui.

Pu C. Lianzuala President Sub Headquarters MUP Kolasib kaihhruaiah hian thusawiin Pu Zoengsanga chuan, 'Kum lama Upa te hi kan hnam tan rohlu ber zinga mi an ni' a ti a. Hei vang hian kum lama Upa te chu inthlahrung lova, an nun atanga an tawn hriatte chu thangthar zawkte thurawn pek nan a hmang turin a fuih a ni.

Kolasib Bawrhsap chuan khawvel a changkang tawlh tawlh a, aia upa zahna kan tlachham tawlh tawlh tih sawiin, 'Kan Kristian na leh kan khawtlang nun hi enfiah a tul hle' a ti a. Kan pi leh Pute hun laiin engkimah an intodelh thin. Kristian kan nih hnuah kan intodelh lo tawlh tawlh a. Thangtharte hian Upate atang zir tur tam tak kan nei tih hei hian a tilang a ni a ti a. Kum lama Upate chu thangthar zawkte kawng kawhhmuh a, zirtirtu ni turin a fuih bawk.

Khual zahawm Er. H. Lallianmawia Sr EE PHED Kolasib pawhin thu sawiin, Kum lama Upate chu Faina leh thianghlimna thlah thlam mai lo tura chahin, Sanitation tih hian Faina leh damreina a kawk a. Faina hi kan tu leh fate kan zirtir a ngai a ni a ti.

MUP Sub Headquarters Assembly ah hian Kum 90 chunglam, Vote thlak ngai pawimawh thlanchhuah te hnenah Kolasib District Election Officer ni bawk Pu Zoengsanga hian chawimawina a hlan a. MUP Sub Headquarters Secretary in report  pe in Sub Hqrs chhungah Area 8 leh Branch 64 awmin member hi 6798 an awm a. Nikum Assembly leh kumin Assembly inkar a Member boral 312 te sun a nih bakah YMA Sub Hqrs Kolasib leh MZP Dist Hqrs Kolasib aiawh ten thu an sawi bawk.

Chawhnu lamah rorel inkhawm neih a ni a, Sub hqrs YMA Kolasib kaihhruaiin hruaitu thar an thlang nghal bawk a ni.