Nithum chhung awh tur Programme on Skill Training on Rural Youth, KVK Lunglei Dist Hnathial te buatsaih chu vawiin chawhma Dar 11:00 khan AMFU Dist Hqrs Lunglei Office ah neih tan a ni. Training hawnna inkhawm hi Pi Lalmuanzovi Sr.Scientist & Head KVK Lunglei Dist chuan kaihruaiin kalkhawm te lawmna thu a sawi a ni. 

He huna Khuallian Pu H.Lalthansanga President MJA Dist Hqrs. Lunglei chuan Training hawnna thu sawiin, mi ramah chuan thiamna hi sum tam tak sengin an zir thin a, hetihlaia a thlawna mithiam ten an thiamna midangte hnena an zirtir tur hi he Training Programme a tel te pawhin a hlut zia an hriat a, hlawkpui ngei an tum a duh thu a sawi. Thiamna tak tak neih tum aia sum dawn theihna tur ringawt rilru Mizo ten kan pu thin hi sim a hun tawh a ni Pu Sangtea chuan tiin, thiamna awmze nei hmanga eizawnna kawng hrang hrang zawh hi tunlai khawvelah a pawimawh tawh tih kan hriat a hun tawh a ni a ti. A sawi zelna ah Khuallian Pu H.Lalthansanga chuan State pachhia kan nih avangin sum seng lova a thlawna Training buatsaih rengte hi kan Sawrkarin a tih theih loh hun pawh a la awm thei a, chuvangin hetianga mithiam zawkte hnen atanga thiamna a thlawna kan dawng thei hi hlutna chang hria a, he Programme a Training zawng zawngte pawhin hmalam hun lo kal zel turah tangkai pui tur leh midang te tana malsawmna atan hmang thei tura thahnem ngai leh hlawkpui ngei tura training tura a duh thu a sawi bawk. 

Training hawnnaah hian Pu Robert. Lalengliana Executive Officer AMFU pawhin thu sawiin, KVK Hnahthial ten AMFU Lunglei Dist Office-a Training pawimawh tak an buatsaih chu lawmawm a tih thu leh tunlaiah thiam inti an tam laiin mithiam tak tak erawh mi ten an zawn zel thu a sawi a, Trainee te pawh midangte tana rawn tlaka Training chhuak ngei turin a fuih a ni. Dr. C.Lalremkima Scientist, KVK Lunglei chuan Technical Report pein hetiang ang Training hi Mizoram Dist 8 ah kalpui a nih thu leh he Training Programme in a tum ber chu Agriculture leh a kaihhnawih lama Thalai ten thiamna awmze nei hmanga hma an lak theih nan buatsaih a nih thu a sawi. Training ah hian Eizawnna kawng hrang hrang Pathum Ar vulh, thlai thar sawngbawl dan leh a dahthat dan nihnih chhung Theory in zirtirna pek an ni ang a, Nithumna ah Practical tihpui an ni ang. 

Attachment

  • Loading attachment...