Krismas leh kumthar lo thleng tur vuakveta lirthei leh a kaihhnawih a mitinte an him tlan zawk nan "Fimkhur la, nun humhim rawh" tih thupui hmangin nimin khan Champhai Kanan Veng PD Sena Memorial Community Hall-ah District chhunga lirthei chi hrang hrang enkawltute chu lirthei kaihhnawih Dan leh hrai zirtir an ni.
He lirthei dan leh hrai inhrilh hriatna hun hi Champhai Police SP Pu RP Meena, Addl. SP Pu VL Lura Hauzel, SDPO Pu Lalringliana Pachuau, DTO Pi V. Lalmuanpuii te leh Traffic Police Officer-te leh Transport a Officer-ten an hmanpui bakah Champhai District chhunga lirthei enkawltu Pawl hrang hrangte an tel a ni.
He hunah hian Kristiante hunpui vuakvetah lirthei chetsualna leh thil duhawmlo a thlen lohna turin lirthei chi hrang hrang enkawltuten dan leh hrai an zawm tur leh tih loh tur pawimawh zualte sawifiah anih bakah dan bawhchhetute hremna pawh tarlan a ni a. Mihring phurh nana hman chi bik Lirthei leihawl leh a te chi bakah Bus khalhtuten an zawm ngei ngei turte chip chiar taka hrilh hriat an nih bakah englai pawh a lirthei a awm tur lehkha pawimawh (valid documents) te tarlan niin, lirthei khalhtute leh enkawltuten zawm vek tura tih anih bakah Champhai District chhungah lirthei tlan velte chu ngun taka vil a nih dawn thu tarlan a ni bawk.
Lirthei leh mihring him tlanna tura Lirthei dan leh hrai in zirtirna hi a tah tawl a neih niin, nimin khan Mihring phur chi Lirthei, Registration-a number kawp kim lova bultan (Odd Numbers) khalhtu leh enkawltute pualin hun hman a ni a. Vawiin hian Number kawp kim a bul tan (Even Numbers) Register lirtheite pualin neih chhunzawm leh a ni ang.
