Champhai District chhunga AH & Vety Department hnuaia NLUP Bawng vulh thlangtu chhungkaw 40 hnenah 3rd & 4th Phase atan tanpuina second installment chu vawiin khan Champhai DVO Office-ah sem a ni.

Bawng vulh thlangtute hnena vawiina tanpui a sem hi Bawng In sakna tura ruahman niin, beneficiary tin hnenah Rs. 19,000 theuh sem a ni a. Vangchhia a chhungkaw 3 leh NE Khawdungsei a chhungkaw 1 ten Sial vulh an thlan leh zawk vangin Sial vulh tur pek an ni thung ang.

NLUP tanpuina semna hunah hian Champhai DVO Dr. Lalchungnunga Pudaite chuan Sorkarin beneficiary pakhat tan bawng hnute pai tamchi pahnih leisak nan cheng 1,30,000 lai a sen hnu in enkawl zuina kawng a dap sak zel a. Beneficiary-ten an vanneihzia an chhut thiam a, chhungkawtinin dinchhuahna atan hman an tum tlat a beisei thu a sawi a. Vawiina an sum dawn pawh chu Ran in sakna atan duan a nih angin a nih a turah tak hmang turin a chah bawk a ni.

NLUP hnuaia Bawng (Dairy cow) vulh thlangtute hnenah hian Bawng hnute tam chi pahnih (pakhat Rs. 65,000) sem a ni a. Bawng hi Meghalaya leh Assam atangte a AH&Vety mithiamte kaihhruaina hnuaia beneficiary ten anmahni kala an duh ngei an thlan a ni.