706/2023-2024

Champhai, the 7th June, 2023: Vawiin khan Samagra Shiksha leh Evangelical Teacher's Fellowship, Mizoramte tangkawp chuan 'Zirna hmanga khawtlang nun inthlak danglamna- Social transformation through education' tih thupui hmangin Champhai District-a School Management Committee (SMC) leh School Management & Development Committee (SMDC) te tan training an buatsaih.

He hun Kahrawt Community Hall-a hman hi Pu C.Lalbiakzauva, DEO & DPC, Samagra Shiksha, Champhai District chuan kaihruaiin training kaltlanga zirho tur chu zirtirtute leh zirna lam kaihhnawiha telte tana pawimawh tur a nih thu a sawi a. SMC leh SMDC te'n hmasawnna an neih ngei a beisei thu sawiin duhsakna a hlan a ni.

Training-ah hian Pu C.Chawngthantluanga, Dy. SPD, State Project Office, Samagra Shiksha, Mizoram hnen atangin SMC leh SMDC te nihna leh mawhphurhna a ken telte ngaihthlak a ni a. SMC leh SMDC te chu school enkawlna kawngah an pawimawh em em laiin tunlaiah a hminga awm ve mai mai anga ngaih theihin a awm mek tih a sawi a; a nihna tur ang taka hman chuam school enkawl leh hmasawn zel kawngah awmze thui tak a neih thu a sawi a. School neitu tak takte chu a awmna veng leh khawtlang an ni tih sawiin, a thawktute chu inthlak reng an nih laiin school erawh chu a hmun ngaiah a awm reng avangin a neitu tak tak leh a chhawr tangkai bertu chu a veng neitu khawtlangte an nih thu a sawi a. SMC leh SMDC ah pawh khawtlang mite an pawimawh thu a sawi bawk a. SMC leh SMDC tih tur pawimawh tak chu school tih hmasawn a nih thu sawiin, school hmasawnna tura tih tur awmte a tarlang nghal bawk.

Dr. Hmingthanzuala, Associate Professor (Rtd), IASE hnen atangin 'Zirna hmanga khawtlang nun thlakdanglam' tih hmangin thu pawimawh tak tak ngaihthlak a ni a. Dr. Samuel Vanlalthlanga, Associate Professor, Aizawl West College leh Rev. Dr. Lalchungnunga, Former Principal, Serampore College-te hnen atangin zirna chungchang leh zirna hmanga khawtlang nun thlakthleng a nih theih dan kawng hrang hrang ngaihthlak a ni bawk.

Training hi nilenga neih niin Pu H. Lalhminghlua, Addl. DPC, Samagra Shiksha, Champhai District chuan lawmthu sawiin training a khar a ni.