707/2023-2024

Aizawl, 7th July 2023: Rural Development Minister Pu Lalruatkima chuan vawiin khan Mizoram State Rural Livelihoods Mission (MzSRLM) ‘Annual Action Plan 2023-24 Roll Out Workshop’ kharna chu Assembly Annexe Conference Hall-ah a hmanpui.

He hunah hian khuallian Pu Lalruatkima chuan MzSRLM hmalakna tur zirhona ‘Annual Action Plan Rollout Workshop’ hun tha tak hman theih a ni chu lawmawm a tih thu a sawi a. MzSRLM kaltlanga thingtlang lama harsa zawk ten eizawnna ngelnghet an nei thei chu lawmawm a tih thu sawi bawkin, hemi kawnga thawktu te inpekna chu a chhuanawm hle a ni, a ti. Self Help Group (SHG) te hmasawnna sawrkarin a ngaihpawimawh thu sawiin Minister chuan MzSRLM leh scheme dang NREGS leh SPMRM te nen ‘convergence’ kalpui mek a ni, a ti a. Convergence kaltlang hian SHG, Village Organisation (VO) leh Cluster Level Federation (CLF) te tan hmasawnna ruhrel rotling engemawzat siam a nih tawh thu a tarlang a, siam zel a nih tur thu a sawi bawk a ni.

Pu Lalruatkima chuan National Rural Livelihood Mission (NRLM) hnuaia scheme - Startup Village Entrepreneurship Programme (SVEP) leh Aajeevika Grameen Express Yojana (AGEY) kaltlanga chhungkaw tam takin hmasawnna leh eizawnna tha tak an hmu chu a lawmawm hle a ni, a ti a. Hei bakah hian Deen Dayal Upadhyaya Grameen Kaushalya Yojana (DDUGKY) hnuaia thingtlang thalaite thiamna tihpun a ni leh he scheme kaltlanga eizawnna tha tak an nei chu lawmawm a tih thu a sawi a ni. Minister hian SHG-te thil siam phochhuahna hun ‘SARAS Fair’ neih thin a nih thu pawh sawiin, Aizawlah SHG-te puala wholesale/ retail outlet neih tuma hmalak mek a nih thu a tarlang bawk. SHG member-te thil siam chhuah chu zawrhchhuah tlak, quality tha leh midangte elphak a nih theih nan kalkhawmte chu SHG member-te fuih a, an mamawh ang thiamna pe zel turin a sawm a ni.

Pu Lalruatkima chuan MzSRLM hnuaia hlawhtlinna changte chu entawntlak a tih thu a sawi a. ‘Theihtawpa kawng zawn chuan theih loh a awm lo’ tih mi te hriattirtu an ni a ti. Mizoram leh Mizo thalaite chu an chhe vek lo a ni tiin ramchhunga theihna (potential) awm haichhuak turin mawhphurhna mitinin an nei a ti a. India ram chhunga midangte entawn tlak khawpin Mizo nu te hian theihna an nei a ni tiin; SHG hmasawnna chu chhungkua, khawtlang leh ram hmasawnna a ni tih hria a, nasa leh zuala tan la turin SHG member-te chu a sawm nghal bawk.

Tun dinhmunah Mizoram State Rural Livelihood Mission hian Mizoram District 11 leh RD Block 28 ah hmalakna a kalpui mek a. Self Help Group 9124 din tawh niin, member 75200 an awm mek a. Village Organisation (VO) 735 din tawh niin, Cluster Level Federation (CLF) 52 neih mek a ni bawk. SHG member ten sum an in puk chhawn tur Community Investment Fund (CIF) cheng nuai 15,541.09 chu VO/CLF ah pek tawh a ni a. Heng Community Funds an puk kual leh MzSRLM kaltlanga training hrang hrang an dawn te hmang hian thingtlanga mi harsa zawk ten eizawnna ngelnghet an neih phah mek a ni.

MzSRLM Annual Action Plan Workshop hi block leh district hrang hranga MzSRLM hnathawkte tan May ni 30 atang khan neih tan a ni a. Kharna inkhawm hi State Mission Manager (Non-Farm) Dr. F. Laldinthara chuan a kaihruai a. MzSRLM CEO Pi H. Lalchhandami chuan AAP 2023-24 Plan inhrilhfiahna hun hmangin, SHG kaltlanga hlawhtlingte chanchin ngaihthlak a ni bawk. Project Manager (Monitoring &Evaluation) Pu Raymond Lalsangzuala chuan lawmthu sawiin hun a khar a. Chawhnu lamah thupui hrang hrang zirhona leh sawihona hun hman nghal a ni bawk.