708/2023-2024

Lunglei the 7th, June' 2023: Vawiin khan Pu Liansangzuala Chhakchhuak, Addl. Deputy Commissioner(P), Lunglei kaihhruaiin DC's Conference Hall, Lunglei ah District Nutritional( Chaw tha ) Committee neih a ni. He hun ah hian ICDS Project hmalakna hrang hrang leh hmalak ngai te sawihona neih a ni.

Committee ah hian Dr. Lalhruaitluangi, District Programme Officer, Women and Child Development Department chuan thu sawiin Nutritional Committee hi kum 2021 ah din a ni a, Lunglei ah chuan committee vawi khat neihna a ni a. Naupang leh hmeichhia te an lo hrisel zawk nan chaw tha ei a pawimawh thu sawiin naupang chaw tha tlachham a buk zang tak tak te, raipuar, nu naute hnute pelai te hnena chaw tha an pek thin thu a sawi a. Lunglei District chhungah ICDS Project pali Lunglei, Hnahthial, Lungsen leh Bunghmun Project te awmin Anganwadi Centre 418 awm thu a tarlang bawk. Chaw tha chi 14 sem thin a ni a, chaw tha te hi quality test neih thin a ni a, Anganwadi Centre a naupang kum 3-6 te tan chaw ei tur an siam thin bakah Anganwadi Worker te hnenah chaw tha ei thatzia mipui te hnena hrilh hre tur a training pek a ni bawk.

Committee ah hian ICDS Project ten Nutrition pek  chungchanga harsatna an neih te sawiin Nutrition phurhna ah te, Internet that tawk loh vanga data an neih that theih loh thu te, Anganwadi Worker te IT lam an thiam tawk loh vang te, thingtlang ah Nutrition an hlut tawk loh thu te tarlan a ni. Committee chuan Nutrition a thlen zung zung theih nan transportation man chungchang ah thuneitu sang zawk te hnena thlen ni se, Anganwadi Centre tin a Gas Connection neih leh naupang chaw tha tlakchham vang a buk zangte data mumal tak an neih theih nana hmalakpui an ngaih thu tarlan a ni bawk.