Champhai District Bawrhsap, District Election Officer Pi Vijay Kumar Bidhuri IAS chuan nimin chawhnu dar 3 khan DC Conference Hall-ah thuthar lakhawmtute kawmin February 23 a V/C inthlan lo awm tura hriat tur pawimawhte hrilhhriatna a nei a. DC hi DLAO Pu James Lalnunmawia leh Addl. SP Pu Ngursangliana Sailo ten an tawiawm a ni.
DC chuan tun V/C inthlan lo awm turah hian Champhai District ah V/C 105 a awm tur thu sawiin heng zinga 4 Vengthlang North, Zion Veng, Khawzawl Hermon leh Khawzawl Kawnzar Veng te chu V/C thar an nih thu a sawi a. V/C seat awm zat chu 445 niin, In awm zat chu 25734 niin voters 82775 an ni a, mipa vote nei zat chu 41167 leh hmeichhia 41608 an awm a, polling booth 137 awmin, venhim hna thawk turin booth tinah police police pakhat zel dah an ni ang a, Champhai District ah booth khat chauh sensitive area a awm a ngaih a ni, a ti.
He inthlanna a chuh duhte tan February ni 1 ah hming pek luh theih a ni ang a, a tuk Feb. ni 2 dar 10:00 am - 2:00 pm ah hming pek luh endik a ni ang a, a tuk Feb. 3 chawhnu dar 3 thlengin inhnukdawk leh duh tan hun hawn a ni ang a, chumi hnuah candidate te hnenah symbol semchhuah a ni ang. V/C inthlana hman thin zingah Laltin, Sana lian leh Kutphah te chu tun tum inthlanna turah hian paih niin a dang pathum sengluh anih thu DC chuan a sawi.
Election Model Code of Conduct chungchang sawiin DC chuan sorkar hnathawkte mawhphurhna tarlangin sorkar hnathawk reng rengin political party awn lam neih a thiang lova, party tan zawng emaw do zawng emaw in campaign loh tur anih thu a sawi a, hmasawnna hna hrang hrang kalpui theih a ni tawh lova, NREGS bikah chuan ni 30 inhlawhna tur sanction fel tawh anih avangin hei hi chu a kal ngaiin a kal rih phawt ang a, a bak chu kalpui theih a ni rih lovang, a ti. V/C inthlan lo awm turah hian DC kaihhruaina hnuaiah District Level Standing Committee siam niin heng mite hian kalphung an thlir dawn a. Inthlanna muanawm tak a awm theihna tur atana hmalakna chi khat atan silai nei zawng zawngin an silaite police station leh outpost ah te silai tun tir an nih tur thu a sawi bawk.
Inthlan result hriat zung zung theihna turin Mobile Phone leh MPRO Network hman tangkai tum a nih thu sawiin DC chuan tun dinhmun ah Ngopa ah In 888 awmna leh voters 2853 awmna chu Champhai District a V/C lian ber a ni a, Vengthlang in dawtin In 718 leh voters 2447 an awm a, Arro khua In 37 awmna leh Chhungte In 48 awmna te chu voters tlemna hmun an ni tih a tarlang a. V/C inthlanna ah hian common ballot paper hmangin common ballot box ah thlak a ni ang a, inthlan zawh veleh vote hi chhum lo chat lova chhiar nghal tur a ni ang, a ti.
V/C Electoral Roll lei duh tan copy khat Rs. 5 zelin emaw a disc in Rs. 100 in lei theih a ni ang a, EPIC nei lo an awm chuan passport, driving license, PAN Card, Service ID, Passbook, Tribal Certificate, Residential Certificate, Pensional document, Freedom fighter ID, Arms License, Job Card, Health Insurance Scheme Smart Card emaw Student ID (thlalak chuang) hman theih a ni ang.
