Pu Robert Romawia Royte, Chief Managing Director, North East Consultancy Services, Mizoram chuan ni 28 January, 2012 a Vanapa Hall-a an Company din champha Foundation Day an hman tur chungchang State Election Commission ah a rawn thlen a, Village Councils/Local Councils Election puan anih tawh avangin Mizoram Chief Minister, Nagaland Education Minister, Mizoram Education Minister leh Dr. R. Lalthangliana, MLA te he function ah hian thusawi phal sak turin a rawn dil a. Commission chuan a dilna hi ngun taka ngaihtuahin Model Code of Conduct bawhchhiatna a awm thei dawn ni a a hriat avangin a rem tih sak thei lova. Commission in a phal sak loh thu ziakna lehkha hi Chief Managing Director kutah ngei hian Commission Office ah ni 24 January, 2012 tlai khan pek a ni a.

Heti chung hian North East Consultancy Services hian an programme kaltlang pui an tum zia tih lan nan ni 25 January, 2012 chhuak tualchhung chanchinbu engemaw zatah an Foundation Day detailed programme hi a ti chhuak lui ta tho a. He a hmalak dan hi Commission chuan a ngaimawhin, a la thutak hle a. Hei vang hian he function hi engti kawng zawng mahni neih a remti lova, inthlanna felfai leh muanawm kan neih theihna tur anih dawn phawt chuan Commission hian ram Danpuiin thuneihna a pek angin, sorkar hmalakna a ni emaw, mimal hmalakna a ni emaw a tul ang zelin a vilin a enzui dawn a ni.

Model Code of Conduct bawhchhiat luih anih loh nan January 28, 2012 ni chhuah atanga ni tlak thlengin Vanapa Hall kalh turin Deputy Commissioner, Aizawl leh Director, Art & Culture Department hriattir nghal an ni.