No.6740/2020-2021

Dated Champhai, the 2nd December, 2020: Nehru Yuva Kendra (NYK), Champhai District hnuaia District Advisory Committee on Youth Programme (DACYP) chu vawiin khan an Chairman Pi Maria C.T Zuali, District Bawrhsap  hovin DC Conference Hall-ah an thu khawm.

Bawrhsap Pi Maria C.T Zuali chuan India ram chu thalai tam tak awmna anih avangin thalaite chu chhawr tangkai thiam a tul thu a sawi a. Nehru Yuva Kendra kaltlanga thalaite chawikanna tura hmalakna hrang hrangte a taka tihhlawhtlin a nih theihna tura tanlak a tul thu sawiin, ramri  depa  awm Champhai district  thalaite  zinga  ruihhlo leh a kaihnawih hluar lutuk  tiziawm tura theihtawp chuah a tul a ni, a ti a.  Pawl hrang  hrang hruaitute chu midangte entawntlak ni tur leh kawng engkima hmahruaia midangte zirtirtu nih tum theuh turin a chah a. Zirna kawngah tun aia tan lak nasat a ngaih thu leh tui thianghlim hnianghnar zawka nei thei tura tanlak pawh ngaihpawimawh  hmasaka  neih a tul takzet thu a sawi bawk a. Faina nunpui leh Covid-19  hrileng  chungchanga hriattur tulte mipuiah a zau thei ang bera zirtirna pek  a tul thu pawh sawiin, thalaite phur taka an penchhuah theihna turin hotu theuhte chu hma hruaia fuihphurtu ni turin a chah bawk.

District Youth Coordinator (DYC)  Pu Dinesh Jangid, Member Secretary, District Advisory Committee on Youth Programme ni bawk chuan NYK hmalakna hrang hrangte tarlangin, NYK chu kum 1972 a din anih thu leh India rama thalai tam takte theihna tangkai zawka chhawr anih theihna tura  din a ni,  a ti a. NYK Champhai hnuaiah  Youth Club 125 leh member 4000 vel an awm mek thu a sawi bawk.  Kum 2020-21 chhunga hmalakna  tur ruahmanna  'Annual Action Plan, 2020-21' chu pharh nghalin uluk taka thlirho anih hnuah pawm a ni.

Thukhawm chuan nakum  January Ni 12 a National Youth Day lawm tur chu thalaiten tangkai zawka an hman theihna tur thlira programme duan nise a ti a. National Education Policy 2020 leh Fit India Movement  te chu thalaiteah uar zawka zirtira a pawimawhnate hrilhhriat nise tiin a rel bawk.  He hunah hian pawl hrang hrang leh line department aiawhte atangin hmalakna  ngaihthlak  a ni  a.  NYK Champhai katlangin Covid-19 hrileng  karah a theih anga hmalak chhunzawm zel anih thu ngaihthlak a ni a. Mask   semchhuah tum 5000  atangin 2000 semchhuah tawh niin, Fit India Movement hnuaiah mpuite nitin minute 30 tal taksa sawizawi tura ngen an nih thu leh mi thahnem takin an kalpui mek thu tarlan a ni bawk a. Mihring  tana hrisel  tak Moringa thing  Champhai districta chin anih theihna turin mithiamte rawn chunga hmalak chhoh nise tih a ni bawk.