No.6739/2020-2021

Aizawl, the 2nd December 2020 : Vawiin khan Land Resources, Soil & Water Conservation Department changtu Minister Pu R. Lalzirliana chuan Aizawl District huam chhunga Rubber chingtu chhungkaw 90 hnenah Rubber sawngbawlna khawl 'Rubber Rolling Machine' leh a kaihhnawih hmanraw dang LRS & WC Department in subsidy kaltlanga an ruahman chu  a hlan a. Rubber chingtute hnena pekchhawn tur heng bungraw phurtu lirthei te hi Minister hian LRS & WC Department Office, Tennis Court bul atangin a vailiam a ni.

Khawl semna puala programme tawi buatsaihah Pu R. Lalzirliana chuan thusawiin, Mizoten rubber kan hmelhriatna hi rei tawh hle mahse a chi tha kan chin loh avangte leh enkawl dan ang tur taka enkawl kan thiam loh avangtein a hlawk lova. Mahse Department in hmangchang hriain tunlai thiamna leh a chin dan turte zirchianga an buaipui hnuah chuan rubber hi eizawnna tlak a ni tih kan hre tan a, a chingtute pawh an pung chho mek a. Chuvangin Sawrkar chuan anmahni tan khawl leh a ur na in 'Smoke House' sakna tur te a ngaihtuah sak ta a ni, a ti.

Minister chuan Sawrkar atanga tanpuina dawnga rubber ching chhungkaw 2927 an awm laiin Sawrkar puihnaa innghat lova mahni kutkawiha rubber buaipui chhungkua an tam zawk a ti a, heng mi te hi an entawntlak hle nia a hriat thu a sawi. Mizorama rubber sawr chhuah chu Tripura aiin a tha nia mithiamten an sawi chu a lawmawm tiin a tir lam kum7/8 vel enkawl ngai mahse chumi hnuah chuan chhungkaw chawmna bakah eizawnna tha tak a ni thei a ni, a ti.

Pu R. Lalzirliana chuan SEDP Pilot Project kaltlangin kuhva chingtu thlanchhuah chhungkaw 200 hnenah huan samna tur cheng 25,000 theuh pek tum a nih thute, rubber chin lama hmalakna atan NABARD atangin cheng  nuai 680 hmuh anih thu te a sawi a. COVID-19 hripui lengin zia lam a pan hunah Department in theihtawp a chhuah tur thu sawiin vawiina khawl dawngtute chu midang tan entawntlak ni turin a fuih a ni.

Programme hi LRS&WC Department Director Pu Hualthanga Chhakchhuak in a kaihruai a. LRS&WC Secretary Pi Sangchin Chinzah leh SEDP hnuaia Rubber & Allied Crops Development Board member e, Department officer leh rubber chingtute an tel a ni.

Aizawl District huam chhung – Thingsul, Saitual, Sakawrdai, Khawruhlian, Hmunnghak leh khaw dang engemaw zata chhungkaw 90 hnenah Rubber Rolling machine leh a chhawm tel bungrua te hi pek a ni a. Khawl man hi beneficiary tinin cheng 10000 in an do let ve a ni.