No.6741/2020-2021

Lawngtlai, Pawltlak thla ni 2, 2020: December ni 4, 2020 khi Lai Autonomous District Council (LADC) hnuaia bial 25 atana Member of District Council (MDC) Inthlanpui, 2020 vote thlak ni a ni a. Tukin zingkar atang khan he inthlan buaipui tur polling party-te chuan an duty-na tur polling station lam an pan tan.

Tukin khan polling station hla zuala duty tur polling party-te chu, an bungraw mamawh turte an lak khawm a, an enfiah leh vek hnuah Lawngtlai Bawrhsap pisa tual atangin an duty-na tur hmun panin an chhuak a. Polling party-ah hian polling official-te bakah, security personnel leh driver-te pawh an tel.

LADC hnuaia bial (constituency) 25-a polling station 111 awm zinga polling station 59-a duty turte chu vawiinah hian an chhuak a. A bak polling station 52-a duty turte chuan naktuk khian an duty-na tur hmun an pan ve leh dawn a ni.

Inthlan nia harsatna a awm loh nana polling station hrang hrang vil tura ruat Sector Officer 19 zinga thenkhat chuan vawiin hian an bial lam an pan ve nghal bawk.