1952/2023-2024

Champhai the 20th September, 2023 - Mizoram Sawrkar flagship program Family Oriented Socio Economic Development Programme (SEDP) Phase 2 chu vawiin khan Kahrawt Community Hall ah Champhai District tan launching neih a ni. He hunah hian Champhai South bialtu MLA & Hon'ble Minister Pu TJ Lalnuntluanga chu khuallian niin Champhai North bialtu MLA & Vice Chairman H&FW Board Dr ZR Thiamsanga chu khualzahawm a ni.

Family Oriented Socio Economic Development Programme (SEDP) Phase 2, Champhai District hnuaiah hian beneficiary 4522 awmin beneficiary-te hnenah hian cheng nuai 1130.50 sem chhuah a ni a, an bank account ah thunluh a ni. Heng beneficiary-te hi SEDP Line Department pariat – UD&PA, Agriculture, AH&Vety, Horticulture, Sericulture, Fisheries, Commerce & Industries leh Land Resources, Soil & Water Conservation Department hnuai ami te an ni.

Hawnna inkhawm Champhai DC Pu James Lalrinchhana kaihhruaiah Minister Pu TJ Lalnuntluanga chuan Champhai District mipuite hnena SEDP Phase 2 sem chhuah leh chuan kan District economy, ei leh bar kawnga kan intodelhna leh mipui mimir te nunah nghawng tha tak a neih ngei a beisei thu sawiin, beneficiary-te chu an sum dawn te a nih tur ang taka hmanga, hlawhtlin pui turin a fuih a. SEDP chu program huap zau leh fun kim anih thu sawiin, he programme hnuaiah hian ei leh bar intodelh, thil siam chhuah leh hralh chhuah, mihring theihna tihpun, mipui dinhmun dawm kan leh khawtlang nun nuam siam, hmasawnna ruhrel siam te a huam vek a ni, a ti a. Heng thiltumte ti hlawhtling tur hian Sawrkar chuan theihtawp chhuah zelin State pum huapin SEDP tanpuina sum te semchhuah anih bakah ruhrel liantham tak tak buatsaihna kawngah te; ram dang nen insumdawn tawnna tura Zokhawthar, Zorinpui, Zochachhuah, Kawrpuichhuaha hmalakna lian tak kalpui mek te; Zohnahthlak te inpumkhatna tura Sawrkar hmalaknate; Ramri venhimna kawngah te; mipui hriselna tura hmalakna kawngah te, Zirna tih hmasawnna tura hmalakna kal mekte leh hmalkna lian tham dang tam tak kalpui zel a ni, a ti a.

Champhai in hmasawnna thar duhawm tak tak nei chho zelin, tun hnaiah GNM School leh MYC Coaching Centre hawn thar a ni a, Champhai chu Mizorama Judicial District 3-na niin tun dinhmunah District Court hmunhma tur ruahmanna a kal mek a. EF&CC Department hnuaiah Conservator of Forests (Eastern Circle) chu Champhaiah ruahman thar niin a office hi karleh lamah hawn a ni dawn a. Nature Learning Centre, Botanical Garden, Mini Zoological Garden leh Nagar Van te pawh ruahman chhoh niin, Tourism Department hnuaia Swadesh Darshan kaltlangin Pi Pute Sulhnu vawn that leh tourism tih hmasawn nan cheng nuai 9000 hu project kalpui chhoh a ni dawn bawk a ni, a ti a. Mi khua, mi State, mi ram kan awt thin a, mahse, keini pawh hian Pathian zarah hma kan sawn ve zel a ni tiin, khua leh khua te hi kan inawt tawn thin a, theihtawp chhuah tlang ila, beiseina eng neiin, hma kan sawn zel dawn a ni tiin kalkhawmte chu hmalak puiah a sawm a ni.

He huna khualzahawm Champhai North bialtu MLA & Vice Chairman H&FW Board Dr ZR Thiamsanga chuan Champhai District mipui thahnem takin SEDP tanpuina an dawng leh thei chu lawmawm tiin mipuite hmakhua ngaia an tana Scheme tha tak buatsaihtu Mizoram Sawrkar hotute chungah lawmthu a sawi a, he SEDP hi a nih tur ang ngeia kalpui anih theihna tura hma la tu Champhai DC leh a staff-te, Line Department thawktute leh Village Level SEDP Committee te thawhrimna leh inpekna chu fakawm tiin, an chungah lawmthu a sawi a. SEDP tanpuina semchhuah chuan kan economy leh kan khawtlangah rah tha tak a chhuah ngei a beisei thu sawiin, beneficiary-te chu an trade thlan theuha rim tak leh tih tak takna thinlung nen lo thawk turin a chah a. Covid-19 hrileng avanga harsatna nasa tak kan tawh hnuah Mizoram chuan harsatna khirh tak tak engemawzat - lirnghing, vawk hri leng, ramri buaina, Myanmar leh Manipur buaina avanga raltlante buaipui chhoh a ngai a. Heng harsatna leh buaina te chingfel tur hian sawrkar chuan tih takzet in hna a thawk a, Covid-19 hmachhawn kawngah pawh India rama thawk tha berte zinga mi kan ni a, NITI Aayog Health Index-ah pawh India ram State te te zingah dinhmun tha tak kan luah a, Myanmar leh Manipur raltlan mi thahnem tak kan enkawl a, ramri buai chungchangah pawh huaisen takin sawrkarin hma a la a ni tiin, Sawrkarin theihtawp a chhuahna chu mipuiten lo hriatpui tura ngenin, thawhho puiah a sawm a ni.

Vawiin program-ah hian Line Department hotute, party hruaitute, media mite leh SEDP Beneficiary thahnem tak an kalkhawm a. Pu Lalrinawma, Project Director DRDO & Member Secretary, SEDP Champhai District chuan Keynote Address a pe a. SEDP hnuaia hlawtlinna hrang hrang – Vawk vulh, Leilet, grape Vaimim, leh Fu ching hlawhtling te chanchin leh interview ngaihnawm tak tak thlirho niin Pu M. Misael, Additional DC Champhai District chuan lawmthu sawina hun a hmang a ni.