1953/2023-2024

Dated Serchhip, the 20th September, 2023: Health Minister Dr R Lalthangliana chuan khum 100 awm theihna tur Serchhip District Hospital building thar sakna tur lungphum chu vawiin khan a phum a. Serchhip District Hospital compound-a lungphum phumna hun urhsun tak hman zawh a nih hnu hian Serchhip Kawnpui VC Hall-ah programme neih chhunzawm nghal a ni.

Dr R.Lalthangliana chuan Serchhip District-in Hospital building tha tak an nei thei tur chu lawmawm a tihzia sawiin a sakna tur sum hi Power Grid Corporation of India Limited (PGCIL) in an Corporate Social Responsibility (CSR) fund atanga za ah za an tum tur a nih thu a sawi a. PGCIL ten an CSR fund diltu thahnem tak zingah, DPR tha tak tak te an dawn thin laiin, Serchhip District mipuite duhsak taka Hospital sakna tur sum an pe chu lawmawm a tihzia a sawi a, PGCIL hotute hnenah Minister chuan lawmthu a sawi a ni. Health Minister chuan mipui hriselna sawrkarin a ngai pawimawh avangin nasa takin tichangtlun tumin tan a la a, Mizoram chhung hmun hrang hrangah hmasawnna ruhrel din belh tam tak a awm a, chung zingah chuan Siaha, Lawngtlai leh Champhai Hospital building thar hawn tawh te, Mamit Hospital building sak mek zawh mai hmabak te, Champhai leh ZMC a Critical Care Block sak tura bul tan te, JICA nena tangkawpin Cancer Super Speciality Hospital sak tan thuai tura ruahmanna siam te a tel a ni.

Health Minister Dr R.Lalthangliana chuan Mizoramin Sawrkarin kum 5 chhungin hriatlawk loh harsatna tam tak a hmachhawn a; COVID hripui do nan budget a telh lawk miah loh Mizoram sawrkar sum cheng vaibelchhe sanghnih vel hman a ni a; vawk pul hri avangin vawk sing nga chuang an thi a; ramri buai avangin inkahna hial a thleng a; Myanmar, Bangladesh leh Manipur atangin kan unau raltlan sing tel an rawn lut a; heng harsatna tam takin a tlakbuak chung pawh a Mizoram sawrkarin kum 5 chhunga project lian tham engemawzat a la nei thei hi Pathian malsawmna ropui tak a ni, a ti. Health Department ah thawktu indaihlohna nasa tak siam that tuma a hmalakna pawh hripui leng vangin a sukuk thu Minister chuan a sawi a. Hetih mek lai hian doctor leh nurse te a tahtawlin lak chhoh zel an ni a, ruahmanna pawh siam belh zel a ni tih a sawi a. Harsatna hrang hrang karah Mizoram State chuan Health ah hmasawnna tam tak hmuin NITI Aayog Health Index ah India ram puma state te (small state) zingah pakhatna hial a ni pha a, nausen kum 1 hnuai lam thi tehna IMR ah pawh India ramah a hniam ber kan nih mek thu a sawi a ni.

Vawiin programme ah hian Serchhip DC kalchhuak, Aizawl DC hna chelh mek tu Pi Nazuk Kumar pawhin thu a sawi a. He project bul tan tu te fakin a hlawhtlinna atan Chief Secretary Pi Renu Sharma chuan a thawhhlawk hle a ni, a ti. Serchhip District Hospital building thar sakna tur project hian a ruhrel dinna mai bakah hmanraw leina tur sum thahnem tak a keng tel a, Serchhip khawpui leh a chhehvel khaw mipuite tan a tangkai dawn hle a ni, a ti.

Serchhip District Hospital sakna tur sum cheng vaibelchhe 21 hi Power Grid Corporation of India Limited (PGCIL) atangin CSR kaltlanga hmuh a ni a. A sak man sen so zawng zawng za ah za an tum dawn a ni. Sum senso zawng zawng ruahman zat atang hian vaibelchhe 2.52 hi hospital hmanrua lei nan hman tur a ni bawk. PGCIL leh Mizoram Sawrkar chuan May ni 27, 2022 khan inremna thuthlung an ziak a. Hospital hi thla 36 chhunga sak zawh tura ruahman niin March 2025 ah peihfel hman tum a ni. A sa tu tur atan hian Mizoram State Works Advisory Board chuan Zamzo Engineering Construction and Consultancy, Aizawl chu a thlang a. Building hlui thiah phalna leh thiahna tur senso hi PWD ten Mizoram Sawrkarah an dil mek a ni.

Health & Family Welfare Department Principal Secretary Pi Esther Lalruatkimi chuan programme hi kaihruaiin kalkhawmte lawmna thu a sawi a. PGCIL Chief Manager Pu AK Barua pawhin thu a sawi. Health Department a Senior EE Pu H.Lalfakzuala’n technical report a pe a. Serchhip District Hospital Medical Superintendent Dr ZD Lalmuanawma’n lawmthu sawiin programme hi a khar a ni.

Lungphum phumna pual program buatsaihah hian Serchhip DC Pu David Lalthantluanga bakah Aizawl atangin Health Department official engemaw zat an tel a. Serchhip khaw chhunga political party hrang hrang aiawhte, khawtlang hruaitute leh tlawmngai pawl aiawh thahnem tak an kalkhawm a ni.