1954/2023-2024

Aizawl, 20.09.2023: Labour, Employment, Skill Development & Entrepreneurship Department in ITI-a zir mekte, zir chhuak tawhte leh State chhunga kut themthiamna lama tui leh thiam thil neite (grassroot innovators) tana a buatsaih, ni thum awh tur PÛM-2023, Innovation Competition & Exhibition Fair chu vawiin khan Govt. Industrial Training Institute (ITI) Campus, ITI Vengah hawn a ni. A hawnna inkhawmah hian Chief Secretary Dr. Renu Sharma chu khuallian a ni.

Khuallian chuan kum thum lai mai a zawn a LESDE in PÛM Innovation Competition & Exhibition Fair an buatsaih ta chu lawmawm a tih thu sawiin exhibition a telte leh chhimtute’n an hlawkpui ngei a beisei thu a sawi a. Inelna rilru tello chuan hmasawnna tha zawk, kalphung tha zawk siamchhuah emaw hmuhchhuah emaw a harsat thin thu a sawi a. He fair hming atana Mizo ten kan hnam nuna hmanrua kan chherchhuahna hmun pûm thlan chu he hmalakna thiltum nen a inhmeh thu sawiin, ITI zirlai, zirchhuakte leh thalai te’n mahni kutkawiha eizawnna kawng start up leh entrepreneurship lama nasa leh zuala tan an lak a beisei thu a sawi. Chief Secretary chuan eizawnna kawng hawng turin kutthemthiamna leh thilsiamchhuah lama thiamna neite tan remchanna buatsaih a, mahni kutkawih ngeia ei an zawn theih nana hmalak zel chu sawrkar in a ngaihpawimawh thu a sawi a. Ni 17.09.2023 a tlangzarh tak, kutthemthiamte tihhmasawnna kawnga hmalakna PM Vishwakarma Scheme leh LESDE hmalakna tam tak chu inzulna a neih thu leh tangkaia kalpui theih a duh thu a sawi bawk.

Dr. Renu Sharma chuan Govt. ITI chungah kum 2022-23 examination ah zirlai 98.02% chuan hlawhtlinna an chan avangin a lawmpui thu sawi telin, hei hian India rama ITI tha berte zingah Mizoram chu a dah thu a sawi a, ITI chu eizawnna atana zirna in tha tak a nih avangin zirlai hmeichhia tam zawk an awm zel a beisei thu a sawi a ni.

PÛM-2023, Mizoram Innovation Competition & Exhibition Fair hi Ministry of Skill Development & Entrepreneurship (MSDE) hnuaiah LESDE Department buatsaih niin sorkar laipui scheme Skills Strengthening for Industrial Value Enhancement (STRIVE) atang leh Atal Incubation Centre-SELCO Foundation (AICSF) Guwahati te chu sum bultumtu an ni a. Inelna hi thuang hnih - Engineering leh Non-Engineering Group ah then a ni a. Engineering ah hian mi 28 telin Non-engineering ah 35, a vaiin 63 an tel a, heng bakah hian sawm bik Innovator leh entrepreneur stall hawng 8 an awm bawk a ni.

Hawnna inkhawma ah hian LESDE Secretary Pu Lalramsanga Sailo chuan PÛM nih phung leh thil tum te sawifiahin kalkhawm zawng zawngte lawmna thu a sawi a, Govt. ITI Aizawl hi tun hma zo khua a PUM dinhmun ang luah mektu a nih thu a sawi. Pi Angela Zothanpuii, Director, LESDE Department chuan lawmthu sawina hun a hmang bawk. Naktuk ni 21.09.2023 hian ITI leh college dang zirlaite leh a duh apiang chhim turin chawhma dar 10 atangin Entrepreneurship Workshop buatsaih a ni ang a. Exhibition Fair-a thil siamchhuah phochhuah te mipui tan Ningani leh Zirtawpni hian lei theiha phochhuah a ni.

‘PUM’ Mizoram Innovation Fair hi kum 2021 leh 2022 PUM competition a tel zingah eizawnna kawnga hlawhtling thahnem tak an awm tawh a ni. Vawiin a hawnna inkhawmah hian Labour, Employment, Skill Development & Entrepreneurship (LESDE) Officials, Government Department Officers thenkhatte, ITI zirlai leh Faculty te bakah LESDE Department thawhpui Atal Incubation Centre-SELCO Foundation, CII Young Indians, Raftaar Agribusiness Incubator (R-ABI), Medhavi Foundation leh Thar thil thlentu(TiLi) aiawh te an tel a ni.