Vawiin khan Green India Mission District Level Steering Committee, Champhai chu an Chairman Champhai DC Pu H. Lalengmawia hovin DC Conference Hall-ah an thukhawm a. National Mission for Green India (GIM)-in a phutna angin Champhai District-a Green Park siamna tur an ngaihtuahin hmun pathum - Champhai Zotlang a Park humhalh mek te, Zote ram ami Vailung Thlar Tlang leh North Khawbung bula Bungte Tlang chu Green Park atan Committee chuan a thlang.

DC Pu H. Lalengmawia chuan Green Park siam hi sorkar laipui atanga district tinah leh Sub-Division-ah te Green Park nei tura ruahmanna lo kal bawhzuina a nih thu a sawi a. District tin tan Green Park siam zat tur erawh bithliah a awmlo a ni. DC chuan Green India Mission hi ramngaw tihchereu nasat avanga sik leh sa inthlak nasa tak, ram chhung mipuiten kan tawrh chhoh mek chu do turin leh, kan tawrh belh loh nana hmalakna a nih thu a sawi a. Champhai District-ah pawh hian thal lai khan ram kang hmuh tur a awm leh thin chu thil pawi tak a ni tiin, ram kang vang hian tuihna a tlem telh telh tih hi mipuiten kan hriat thar a pawimawh a ni, a ti a. Green Park siam tur chu a bul hnai ami te tan rigawt nilovin, mitin tana thatna tur anih avangin a humhalh kawngah te pawh tan lak tlan a ngaih thu DC chuan a sawi a ni.

Vawiina District Level Steering Committee-in Green Park atan a thlanchhuah hmun pathum te hi a zau zawng teh chhuak turin Forest Department chu hma la turin a ruat a, Sub Hqtr. YMA chuan a teh hna atan hian tha a thawh ang a, naktuk June 3rd atang hian an tan dawn a ni. Green Park enkawl leh a tul danga mawhphurtu tur committee hran hi din a la nih loh avangin Champhai DC Office chuan mawhphurhna a keng rih dawn a ni.

Green India Mission hnuaiah hian rampum chhunga ramhnuai (forest cover) tih zauh te, mi tam zawk tan ramngaw atanga eizawnna (forest based livelihood) siam a nih theih nan te, nungcha leh thing leh mau humhalh leh environment siam thatna tur pawimawh tak tak dangte a tel a. Sorkar laipui scheme dangte nen pawh thlunzawm a ni bawk.