3759/2023-2024

9th February, 2024 : Naupang kum 1 atanga 19 inkarten rulhut an pai lohna tura rulhut hlo pek beihpui leh rulhutin a nghawng thalote inzirtirna hun, National Deworming Day (NDD), 2024 chu vawiin khan Govt. Vengthlang Middle School ah Pu M. Misael Additional DC, Champhai chuan khuallian niin a hawng.

National Deworming Day (NDD), 2024 hawnna programme hi Pi C. Ramdinmawii Asst Director(F&D) , Champhai chuan kaihhruaiin Sawrkar laipui hmalaknain kum 2015 atangin National Deworming Day hi India ram pumah hman tan ani a, kumtin a rualin rulhlut do beihpui thlakna NDD hi tumhnih hman thin niin a thawhkhatna Febuary leh a thawhhnihna August thlaah te hman thin a nih thu a sawi.

Pu M. Misael Additional DC chuan thusawiin rulhut hlo ei beihpui thlakna National Deworming Day chu hriselna kawng kan inzirtir thar lehna atana hun pawimawh tak anih thu sawiin National Deworming Day (NDD), 2024 thawhkhatna hman chhungin District naupangten rulhut hlo an ei vek theihnan nu leh pa te, zirtirtute leh Department-te theihtawp chhuah turin a chah a, rulhut hian taksa ah harsatna a thlen a, thisen tlakchhamna leh hriatna lama hmasawnna a tichhe thin a. Hei hian naupangte zirna lama an hlawhtlinna leh an nunphung a tih buai theih avangin ei leh in an fimkhur a ngai ani a ti. Zirlaite chu vaihlo leh a kaihhnawih, zu leh damdawi hmansualna laka an fihlim a ngai tiin, nu leh pa te zirtir lettu ni turin a chah a, dinhmun sang zawk an luah theihna turin an zirnna ah tuihalna, taimakna leh tih hram hramna nei a, an thiamna leh theihna te an hman tangkai theihnan an taksa rilru leh hriselna enkawl tha tura chahin an thil zirte pawh hriatthiam tak tak na neih tum zel turin a fuih bawk ani.

National Deworming Day (NDD), 2024 thawhkhatna hi vawiin February ni 9 atangin February ni 16 thleng neih tur a ni a. Hemi hun chhung hian District chhunga zirna in hrang hrangah rulhut hlo (Albendazole) a huhovin ei a ni dawn a, zirna ina inziak lut lo te chu ASHA-ten an inah kal chilhin an pe dawn a, a ei turten an ei veka tumah hmaih an awm loh nan a thualnawmna hi February ni 16, 2024-ah neih leh tur ani.

Dr. Krossnunpuii, Microbiologist, District Hospital Champhai hnen atangin Powerpoint Presentation hmangin rulhut pai ina hriselna a nghawng theih dan te leh rulhut laka kan him theih dan tur hrang hrang zirtirna ngaihthlak a ni bawk.

Vawiina National Deworming Day hawnnaah hian Pu M. Misael Additional DC Champhai chuan naupangte hnenah rulhut hlo (Albendazole)hi an ei tir nghal bawk a ni.

Champhai District Level Coordination Committe on National Deworming Day chuan naupangte rulhut laka anlo fihlim ngei theihnan National Deworming Day, 2024 hi ngai pawimawh a, nu leh pa ten kan fa te rulhut hlo ei tir ngei turin District mipuite a sawmin a ngen a ni.

National Deworming Day hawnnaah hian Pu Lalengkima APO, MGNREGA, Pu Lalbiakzauva DEO, Champhai te hnen atangin thusawi ngaithlak a ni bawk.