3758/2023-2024

Aizawl, the 9th February 2023: Parliament session kal lai mekah vawiin khan Rajya Sabha MP Pu K.Vanlalvena chuan India sawrkarin Indo-Myanmar ramri hung kalpui a tum chungchang chuan Mizoram mipuite duhdan a ni lo a, he thutlukna hian Zoram mipuite a thawng hle a ni tih Home Minister Pu Amit Shah a hnenah ziakin a thlen.

British sawrkarin dik lo taka kan ramri min siamsak avangin Zofate chu India,Burma leh East Pakistanah te tihluihnaa then darh kan nih thu leh he ramri diklo tak hi India independence tirh atanga tun thlenga siam that la ni lo hi hnam anga inrahbehna a nih thu Pu K.Vanlalvena chuan Pu Amit Shah a hnenah hian a thlen a.He ramri diklo hi siam thata rorelna pakhat hnuaia awm kan nghah reng laia Ramri hung tumna lo awm ta hian Zofate min barakhaih a ni tih a sawi bawk.

India independence hnu kum 75 chhung zalen taka kan lo inkal pawh thinna Free Movement Regime, tih tawp tumna pawh hian ramri bul hnaia chengte ve ve tan harsatna nasa tak a siam tur thu a thlen bawk a ni.

Indo - Myanmar ramri hung hian ramri kal tlanga dan lova sumdawnna hrang hrang drugs leh ralthuam tawlh ruk thin te hi a tihtawp beiseina avang a nih chuan fencing hian chung sumdawnna te chu a tawp phah dawn lo tih Bangladesh Border fencing siam zawh tawh atang hian a hriat theih thu leh Bangladesh ramri kaltlanga ralthuam tawlhruk vawi tam tak Ramri vengtu ten an man thin dan atang hian a lang fiah tih Pu Vena chuan a sawi bawk a.Myanmar nena kan in rina hi hung a nih chuan kan sangha manna tha tak KM 500 laia sei ramria luang mek kan lui te chu ramri pawnah dah a nih dawn avangin kan hloh dawn tihna a nih thu a thlen bawk a.Hengte avang hian Indo- Myanmar ramri hung tumna hi Mizoram ah tih loh ni se tih Pu Amit Shaha hnenah hian Mizoram MP chuan ngenna a thlen a ni.

Indo-Myanmar fencing siam tumna hi thulh tura ngenna All Party Leaders meeting ah Pu K.Vanlalvena hian a lo sawi chhuak tawh a.Parliament Session kallai mekah Rajya Sabha-ah au chhuah pui turin dilna vawi li lai a thlen chungin hun pek a ni lo a.Lok Sabha lamah Indo-Myanmar fencing siam tum a nih thu te Central Minister ten an sawi chhuah lai a chumi chungchang sawi chhuah phalsak a ni lo chu North East tlangmite dikna zah lohna ni hiala a ngaih thu Pu K.Vanlalvena chuan a sawi bawk a ni.