3757/2023-2024

Aizawl, the 9th February, 2024: Ruihhlo laka India ram a fihlim theihna tura hmalakna Nasha Mukt Bharat Abhiyaan (Drug Free India Campaign), Aizawl District hnuaiah Aizawl District chhunga Veng/Khua hrang hrang 25 ah hmalak a ni dawn a; hemi chungchang sawiho hian vawiin chawhma dar 11:00 khan Aizawl Pi Nazuk Kumar IAS kaihhruainain DC Conference Hall-ah MHIP hruaitute nen meeting neih a ni.

Meeting kaihruaitu Aizawl DC Pi Nazuk Kumar chuan MHIP hruaitute chu anmahni phak tawk theuhah hmeichhiate zingah ruihhlo chungchang nasa lehzual zawka zirtirna pe a, ruihhlo dona kawnga theihtawp chhuah turin a sawm a. Aizawl district huam chhunga khua/veng 25 ah Near Drug Free Village puang thei tura hmalakpuiah a sawm bawk.

He meeting-ah hian Aizawl District huam chhunga hmeichhia/thalai leh naupangte zinga ruihhlo hmansual hluar zel chungchang leh a venna kawnga hmalak dan turte sawiho a ni a. Mizoram Social Defence & Rehabilitation Board, Social Welfare & Tribal Affairs Department-in naupangte zinga zirchianna/survey a lo neih tawh chu enho a ni a. Zirchiannain a tarlan danin ruihhlo ti tharte a kum telin an kum a naupang tial tial a, khawtlangah ruihhlo hmuh theih leh ban phak maia a tam ta hian hmeichhia/thalai leh naupangte dinhmun tiderthawngin ruihhlo hmansual kawngah a hip nasa zual deuh deuh ni a hriat a ni.

Nasha Mukt Bharat Abhiyaan (Drug Free India Campaign) hnuaiah hian Mizoram chhung District tinah DC Chairman-na hnuaiah hmalak a ni a. Aizawl district-ah pawh kawng hrang hranga hmalak chhoh zel niin, school/college naupangte zingahte, kohhranahte leh abik takin hmeichhiate zingah pawh hma lak chhoh mek a ni.