Vawiin khan Champhai District chhunga khaw pakua (9) - Champhai, Khawzawl, Khawbung, Kawlkulh, Ngopa, Kawlbem, Khawhai, Hnahlan leh Mualkawi ah te Sub-Headquarter leh Group YMA hmalaknain Remna Ni Pearl Jubilee ropui taka lawm a ni a, mipuiten an hlut hle. A lawmna pui ber chu Kahrawt Field, Champhaiah Champhai Sub-Headquarters YMA buatsaihin neih a ni a, Champhai North Bialtu MLA Pu TT Zothansanga, Parliamentary Secretary, chuan khuallian niin a hmanpui.

Khuallian Pu TT Zothansanga chuan kum 1986, June ni 30 zan chu Mizoram mipuite hlim rual ber tum ni hiala a hriatthu sawiin, kum 30 chhung Remna Ni lawm kawngah inremlohna awm deuh thin mahse CYMA in huapzo taka hmalakna a kalpui hnua Remna Ni lawmna hmasa ber chuan mipuiin an remna an ngaihhlutzia a tilang a ni, a ti a. Khuallian chuan zofate chu Pathianin rambuai hun chhung, kum 20 chhung zirtirna min pe nia sawiin, remna leh muanna kan neih hnuah hian hmasawn tura thawhrim a tul a ni, ti a. Hmasawnna tura thahnem ngaihna avanga malsawmna petu Pathian theihnghilhlo tura mipuite ngenin, “Pachhiate ngaihsak hi kan kova Pathianin mawhphurhna min pek a ni,” a ti bawk.

Champhai District Bawrhsap Pu Vanlalngaihsaka, IAS pawhin ‘Remna Baloon’ chhuah paha thusawiin rambuaiin khawsak phung a tihkhaihlak nasat zia sawiin, “Remna Ni ah hian inthenawm khaw venna, chhungkua leh eizawnna hmuna inremna I siam tan ang u,” tiin mipuite a sawm a ni.

Kahrawt Field-a Remna Ni lawmna programme hi Remna Ni Celebration Committee Chairman, Pu C. Lalbiakzauva, Champhai Sub-Headquarters YMA President ni bawkin a kaihruai a. Khuallianin Remna Ni puanzar pawtpharhin YMA Branch hrang hrang leh mipuiten ‘Ro Min Relsak ang che’ tih hla an sa hova. Champhai Sub-Headquarters MUP-ten hlado chhama tlang an tlir hnuah program tan a ni. Remna Ni Celebration Committee Secretary, Pu PC. Lalrawnliana, Champhai Sub-Headquarters YMA, chuan Remna Ni programme huaihawt a nih chhan leh ruahmanna kalpui a nih dan report a pein, remna leh muanna vawng nung tura mipui kalkhawmte thutiam lakna a kaihruai bawk. He hunah hian YMA Branch 11 te bakah MHIP Champhai Sub Headquarters, MUP Champhai Sub Headquarters, Zomi Cultural Club, Govt GM H/S, Govt. R. Hranga H/S leh Govt. Vengthlang Middle School pipe band ten zai leh lamin mipuite an awi a. Kohhran aiawh leh Political Party zawng zawngte aiawh hnen atangin thusawi ngaihnawm leh bengvarthlak tak tak ngaihthlak a ni bawk.

Champhaiah hian Remna Ni Pearl Jubilee lawmna atan hian kawng hrang hrangin hmalak a ni a. Nimin lamah District Hospital, District Jail leh Home panga – Metakhen, TNT (MZ Home), Emmanuel After Care, Genesareth Gospel Home leh Grace Reciever Home ah te Remna Ni thilpek pek a nih bakah zan lamah CHANEM chung zawl Balloon Rocket kahchhuah ani bawk. YMA Branch hrang hrang atanga kalkhawm ten District Hospital Blood bank-ah an thisen dawn theih zat, unit 47 pek a lo ni tawh bawk.