Vawiin khan Remna Ni kum 30-na (Pearl Jubilee) chu Lawngtlaiah hman a ni. Lawngtlaia Remna Ni lawmna hi chawhma dar 11-ah DC Conference Hall-ah hman a ni a. Thupuiah “Peace for Progress and Prosperity” (Hmasawn nan Remna leh Muanna) tih hman niin, Lawngtlai District Bawrhsap Dr A. Muthamma chu Khuallian a ni.

Khuallian Bawrhsap chuan Remna Ni kum 30-na champhaphak hman a ni thei chu lawmawm a tih thu sawiin, district mipui zawng zawng ‘remna chibai’ a buk nghal a. Rambuai lai nun harsa tak pal tlang a, Mizoramah remna leh muanna a awm thei hi a lawmawm hle a ni tiin, remna lo awm theih nana tha thawhtu zawng zawng chuan chawimawi an phu hle a ni, a ti. Mizoram chu kum 20 lai rambuai ni mah se, India rama state ralmuang ber nihna a hauh thei leh kum 30 lai mai remna tluantling a awm thei chu thil chhinchhiah tlak tak a ni tiin, remna chu hlut a, chhawm nung zel turin Khuallian chuan district mipuite a sawm a. Remna leh muanna hnuaia hna kan thawh phawt chuan Lawngtlai District hian hma kan sawn zel ang a, ei leh bar leh khawsak phungah pawh dinhmun sang takah kan invawrh thei dawn a ni, a ti.

Lawngtlai District Superintendent of Police Pu F.Lalsanglura pawhin thu sawiin, rambuai laiin nun a harsa a, ram a ralmuan chinah chuan kawng tinrengah hmasawnna hmuh tur a awm a ni, a ti a. Mizoram chu a ralmuan avangin Police nih pawh a nuam a, eng kimah mipui nen tang rualin hna a thawh theih a ni tiin, Lawngtlai District hmasawn nan boruak ralmuang leh muanawm tak neih reng a tul thu a sawi. Thupui sawitu Additional DC Pu R.Lalsangluaia chuan rambuai lai nun hrehawmzia sawiin, remna thuthlung ziah a ni chu Mizo mipuite tan thil lawmawm tawpkhawk a ni, a ti a. Mizorama remna a lo awm theih nan mi tinin theihtawp kan chhuah theuh va, tu mah inchhuang tur bik kan awm lo tiin, remna chhawm nun zel chu kan mawhphurhna leh ngaih pawimawh tur zawk a ni, a ti.

Pu C.Sangchhunga, Executive Member i/c Agriculture chuan rambuai laia mipuiin harsatna hrang hrang an tawhte a sawi a. Remna hi a hlu a, remna awm lo se, Mizoramin tun dinhmun hi kan phak lo vang tiin, remna nei tur chuan tlawm ngam a ngai a ni, a ti.

Vawiina Remna Ni lawmnaah hian Lawngtlai SDO (Sadar) Pu Lallawmawma chuan kal khawmte lawmna thu a sawi a. BCM pastor Rev. F.Lalnunmuana’n hunserh hmangin, DRDA Project Director Pu H.Dolianbuaia chuan lawm thu sawina hun a hmang. He hunah hian mipuiin “Ro min relsak ang che” tih hla an sak ho bakah, zaithiamte zai ngaihthlak a ni bawk.

He hunah hian Lawngtlaia sawrkar department hrang hrang officer leh staff te, NGO leh political party ai awh te, chanchinbu mi leh sikul naupang te bakah, remna ngaihlutu mi eng emaw zat an tel.

Lawngtlaia Remna Ni lawmna atan hian khawlai dungah banner leh poster eng emaw zat tar niin, sawrkar office hrang hrangte’n an office te an cheimawi bawk a ni.