Ramchhung hmun dangte rualin Remna Ni champha vawi 30 na chu Mamit ah pawh ropui taka hman a ni a, Mamit DC Pi Lalbiaksangi chuan khuallian niin a hmanpui.
Mamit ah hian Remna Ni lawmna hi Chhim Veng YMA Hall ah hman a ni a, tukin chawhma dar 10:30 khan Mamit DC chuan Remna Ni Puanzar a pawhpharh hnuin inkhawm neih chhunzawm a ni.
Remna Ni lawmna inkhawm hi Organising Chairman Pu Zatluanga Sailo chuan a kaihruai a, khuallian Pi Lalbiaksangi chuan Remna hlutzia Mizo ten kan hre zel a hetianga a huhova hman a ni chu thil chhinchhiah tlak tak a nih thu sawiin Remna kan neih chhunzawm zel theih nan mitin kan pawimawh vek a ni a ti.
Mamit a Remna Ni lawmna ah hian Sub-Hqrs. MUP President Pu Z. Sangliana chuan hunserh hmangin Remna Ni thupui "Remna mitin tan" tih chu KHJC Chairman Rev. Lalhruaitluanga Ralte in a sawi a. Mamit khawpui chhunga Political Party aiawh theuh ten thu an sawi vek bawk a ni.
He hunah hian Mizo hnam lam chi hrang hrang, zaipawl leh malzai te ngaihthlak a nih bakah Remna Ni puala buatsaih- Essay inziah siak leh Peace Run a lawmman dawngtute hnenah lawmman hlan a ni bawk a ni.
Remna Ni lawmna puala Photo Exibition neih chu naktuk thlengin mipui tlawh theih tura hawn a ni ang.
Chawhnu lamah Remna Ni Lawmna pual hian Mamit Officer club te leh Sub Hqrs YMA ten football hmuh nawm tak an khel a ni.
Remna Ni Lawmna hi Mamit District Chhung YMA Group hrang hrang te chuan ropui takin an hmang ve bawk a ni.
