Champhai North Bialtu MLA, Pu TT Zothansanga, Parliamentary Secretary, chuan tukin zing dar 7 khan Champhai Vengthlang ‘YMA Ralven Buk’ a hawng a. Parliamentary Secretary hian Champhai District Hospital pawh tlawh nghalin Hospital Complex-ah Remna Ni pualin thing a phun bawk.

Parliamentary Secretary Pu TT Zothansanga chuan Vengthlang YMA Ralven Buk hawnna inkhawm tawiah thu sawiin, "Thawhhona leh tanrualnate avangin kan khawtlang hi a mawi thin ni,” a ti a. Vengthlang Branch YMA ten an sum senral phulo khawpa in tha an sa thei chu fakawm a tih thu a sawi.

YMA Ralven Buk hawnna inkhawm hi Branch YMA President Pu C.Laltanpuian a kaihruai a, Treasurer Pu H. Lalthanmawia chuan report pein Champhai Vengthlang YMA Ral Ven Buk hi Pu TT zothansanga MLA LAD Fund cheng nuai 5 hmangin kum 2014 khan sak tan a nih thu leh Information Centre leh waiting shed nuam tak bakah dawr pathum a awm thu a tarlang a.

Champhai North bialtu MLA Pu TT Zothansanga hian tukin zingkarah vek hian Champhai District Hospital a tlawh a. Vengchhung hruaitute leh Hospital thuneituten lo dawngsawngin damdawiin room hrang hrang an fan pui a. Parliamentary Secretary hian Remna Ni pualin Hospital Complex-ah bung tiak a phun nghal bawk.

Vawiin vek khan Pu TT. Zothansanga, Parliamentary Secretary, chuan Mizorama remna leh muanna a awm theih nana theihtawpa hmalatu, Indira Gandhi leh Rajiv Gandhi te hriatrengna lungphun, CHANEM tualah pangpar a dah bawk.