Vawiin khan Mizoram hmundangte rualin Mizoram a rambuai tuar nasa ber tia sawi thin, Khawzawlah pawh Remna Ni lawmna chu ropui takin khawtlang mipuiten an hmang.

Khawzawl Field No. 1 a Remna Ni lawmna neihah hian khuallian SDO(C) Pu Lalrinzuala, MCS chuan thu sawiin Rambuai laia kan rual ute tawrhna te, kan hmeichhia te dinhmun chhiatzia te chu tunlai thangtharte hi chuan kan hre pha tawh lova, rambuai laia kan harsatna te chu remna leh muanna in sukiangin khang hunlaia kan ngaihtuah phak loh In tha tak takte tunah chuan han hawi ila, hmun tinah hmuh tur a awm tawh a ni, a ti a. Thalaite chu remna leh muanna hlut a, mahni ke a din chhuah chu mahni mawhphurhna a ni tih hre reng a, vanglai hunte tha taka hmang turin a chah a ni.

Khawzawl Remna Ni Organizing Committee Chairman, Pu P.C. Rosiama, President, Khawzawl Group YMA pawhin thu sawiin Kum tam tak chhung inremna nei lo leh Political Party ten mahni remchan dan anga an hman thin hnuah, Remna Ni chu a hming pu zo tak mai a, inrem leh lungrual taka hman a ni ta chu lawmawm a tih thu a sawi a. Remna leh muanna kan neih chu Zofaten kan vawn nun zui zel a tul thu sawiin remna leh muanna vawng nun thei turin Zofate tana thil tha lo, zu leh ruihhlo te, eirukna leh hlemhletna te do tlan a, tlawmngaihna leh Mizo nunzemawite kan chhawm nun zel a tul thu a sawi bawk.

Vawiina Khawzawl a Remna Ni puala hun hmanah hian J.H. Vanlaltluanga, Assistant Secretary, Organizing Committee kaihhruaiin Remna Ni puala thu tiam rualna neih a ni a, Tuichang North Block Political Party President te leh Khawzawl khawchhunga Kohhran hrang hrang bialtu Pastor te bakah Khawzawl Joint Village Council President ten thu an sawi bakah zaithiam te an zai a, YMA Branch hrang hrang leh Joint MHIP ten hnam lam an entir bakah Khawzawl khawchhunga Presbyterian Kohhran Pastor bial pathum a Bial zaipawlte chuan a huhovin ‘Halleluiah Chorus’ an rem a, 2nd. I.R. Battalion Pipe Band in lam hmuh nawm tak an entir bawk.

Khawzawla Remna Ni lawmnaah hian Khawzawl khaw pawn atangin Chawngtlai Sahlam Cultural Group, Ngaizawl YMA leh Rabung YMA ten hnam lam hmuhnawm tak an rawn entir bawk a. Khawzawl a hunpui pual a hun hman tawhah chuan mipuite ngaihhlut hlawh ber zinga mi niin mipui an pungkhawm thahnem hle a. Chheihlam, chai leh hnam lam dangte chu mipuiten ngaihlu hle a ni.