Vawiin chawhnu khan Champhai District atanga Mizoram Accredited Journalist atana thlan thar mi 13 te hnenah      Champhai District Information & Public Relations Officer (DIPRO) Dr Lallawmkima chuan Press Accreditation Card a hlan. 

Accreditation Card inhlanna hun hi DIPRO Office Chamber-ah neih niin, Dr Lallawmkima chuan  Champhai District chhunga Chanchinbumi 13 te Mizoram Accredited Journalist atana  State Sawrkarin a rawn thlang chu lawmawm a tih thu leh Accredited Journalist tharte chu thinlung taka a lawmpui thu a sawi a. Press Accreditation chu Sawrkarin Chanchinbumite a hriatpuina leh nemnghehna pawimawh tak a ni, a ti a. Sawrkarin Journalist-te tan hamthatna hrang hrang a siam sak thin thu sawiin,  sawrkar policy leh hmalakna hrang hrangte mipuite zirtir kawnga Chanchinbumite hnathawh chu fakin, tunhnaia Vaimim hmun suasama Loneitute tibuai em em tu Fall Army Worm (FAW) pangang puang dona kawnga Sawrkar an tawiawmna te chu fakawm a tih thu a sawi a. Mipui rawngbawlsak leh Zirtirna kawngah sawrkar tawiawm zel thin turin a sawm a ni.

Mizoram Accredited Journalist thlan tharte chuan Sawrkarin a hun tak leh hma thei ang bera Accredited Journalist thlang fel a, Accreditation Card a semchhuak thei chu lawmawm an tih thu an tarlang a ni. Vawiin a Accredited Journalist-te hnena semchhuah Press Accreditation Card hian  May Ni 1, 2019  atanga March, 2021  thleng a huam dawn a.  Accredited Journalist thlan thar 10 te hi Champhai khawpui chhunga Chanchinbumite niin, a dang 3 te hi Khawzawl a Chanchinbumite an ni.